കണ്ണൂര്‍: ലൈബ്രറി കൗണ്‍സില്‍ സംഘടിപ്പിക്കുന്ന താലുക്ക്തല ബാലോല്‍സവത്തിന് തുടക്കമായി. ബാലവേദി അഫലിയേഷനുള്ള 270 ഗ്രന്ഥശാലകളിലെ ബാലോല്‍സവത്തിന് ശേഷമാണ് താലുക്ക് തല മല്‍സരം നടക്കുന്നത്. കണ്ണൂര്‍ താലുക്കിലെ രചനാ മല്‍സരം കോളേജ് ഓഫ് കോമേഴ്‌സില്‍ നടന്നു.
ആസ്വാദന കുറിപ്പ് തയ്യാറാക്കല്‍, കഥാപാത്ര നിരൂപണം, ചിത്രീകരണം, കാര്‍ട്ടൂണ്‍ രചന, ഉപന്യാസ രചന, കഥരചന, കവിത രചന എന്നീ ഇനങ്ങളിലാണ് മല്‍സരം നടന്നത്. ഇരുനൂറോളം വിദ്യാര്‍ത്ഥികള്‍ പങ്കെടുത്തു. താലൂക്ക് പ്രസിഡന്റ് ഇ. ചന്ദ്രന്‍, സെക്രട്ടറി എം. ബാലന്‍, ജില്ലാ വൈസ് പ്രസിഡന്റ് എം. മോഹനന്‍, എ. ശ്രീധരന്‍, പി.എം കൃഷ്ണപ്രഭ, കെ. ധര്‍മന്‍, പ്രഭാകരന്‍ തായാട്ട്, അരുണ്‍ ചിടങ്ങില്‍ എന്നിവര്‍ മല്‍സരത്തിന് നേതൃത്വം നല്‍കി.
സ്റ്റേജ് മല്‍സരങ്ങള്‍ ജൂലൈ എട്ടിന് ചാല ഹയര്‍സെക്കന്ററി സ്‌കൂളില്‍ നടക്കും. കാവ്യാലാപനം, ചലച്ചിത്ര ഗാനാലാപനം, കഥാ പ്രസംഗം, മോണോ ആക്ട്, നാടകം, നാടന്‍ പാട്ട് എന്നീ ഇനങ്ങളിലാണ് സ്റ്റേജ് മല്‍സരം. ബാലവേദി അംഗങ്ങളായ യുപി, ഹൈസ്‌കൂള്‍ വിദ്യാര്‍ത്ഥികളാണ് മല്‍സരത്തില്‍ പങ്കെടുക്കുന്നത്. തലശേരി താലുക്ക് മല്‍സരം ജൂലൈ 14,15 തീയ്യതികളില്‍ കൂത്തുപറമ്പ് ഗവ ഹയര്‍സെക്കന്ററിയിലും തളിപറമ്പ് താലുക്ക് ജൂലൈ 8ന് തലവിലും ഇരിട്ടി താലുക്കിലേത് 13ന് കീഴൂര്‍ വി.യു.പി സ്‌കൂളിലും നടക്കും.