ബോവിക്കാനം: മുളിയാര്‍ പഞ്ചായത്തിലെ ബാവിക്കരയില്‍ കുടിവെള്ളത്തിനു ക്ഷാമം. ഒരു മാസമായി പ്രദേശത്ത് കടുത്ത ദുരിതമാണ് അനുഭവപ്പെടുന്നത്. ബാവിക്കര ഗവ.എല്‍.പി സ്‌കൂളിലെ കുട്ടികള്‍ കുടിവെള്ളത്തിനായി നെട്ടോട്ടമൊടുകയാണ്. സ്‌കൂളില്‍ ഉച്ചക്കഞ്ഞി പാകം ചെയ്യാന്‍ പോലും വെള്ളം കിട്ടാനില്ല. നൂറോളം കുട്ടികള്‍ പഠിക്കുന്ന സ്‌കൂളിലെ ശൗചാലയത്തിലും വെള്ളമില്ലാതെ അധ്യാപകരും വിദ്യാര്‍ഥികളും ഏറെ ബുദ്ധിമുട്ടനുഭവിക്കുകയാണ്.
ജല അതോറിറ്റിയുടെ പൈപ്പ് ലൈന്‍ വഴി സ്‌കൂളിലേക്ക് വെള്ളം എടുത്തിരുന്നെങ്കിലും പുഴയില്‍ ഉപ്പുവെള്ളം കയറിയതോടെ അതും ഉപയോഗിക്കാന്‍ പറ്റാതെയായി. സമീപത്തെ വീടുകളില്‍ നിന്നു വെള്ളമെടുത്താണ് ഇതുവരെ ഉച്ചക്കഞ്ഞി തയ്യാറാക്കിയിരുന്നത്. ആ കിണറുകളെല്ലാം വറ്റാന്‍ തുടങ്ങിയതോടെ ഇപ്പോള്‍ തീരെ വെള്ളമില്ലാതായിരിക്കുകയാണ്.
സ്‌കൂളിനടുത്തെ റോഡരികില്‍ ഒരു കുഴല്‍ക്കിണര്‍ ഉണ്ടെങ്കിലും അത് ഉപയോഗശൂന്യമാണ്. ഈ സ്‌കൂളടക്കാന്‍ ഇനിയും ഇരുപത് ദിവസമുണ്ട്.
സ്‌കൂളിലേക്ക് കുടിവെള്ളമെത്തിക്കാനുള്ള നടപടി ഉടന്‍ സ്വീകരിക്കണമെന്നാണ് നാട്ടുകാര്‍ ആവശ്യപെടുന്നത്.