സിനാഅ്: ഈജിപ്തിലെ സംഘര്‍ഷഭരിതമായ സിനാഅ് അതിര്‍ത്തി പ്രദേശത്തുണ്ടായ ഏറ്റുമുട്ടലില്‍ 46 പേരെ കൊലപ്പെടുത്തിയതായി സൈന്യം അറിയിച്ചു. 'വളരെ അപകടകരമായ' 46 ഇസ്‌ലാമികരെ കൊലപ്പെടുത്തിയെന്നും മൂന്നുസൈനികര്‍ വീരമൃത്യുവരിച്ചുവെന്നും സൈന്യം വിഡിയോ സന്ദേശത്തില്‍ അറിയിച്ചു. എന്നാല്‍ ഏറ്റുമുട്ടല്‍ നടന്ന സ്ഥലമോ സമയമോ വ്യക്തമാക്കിയിട്ടില്ല. സംശയമുള്ള 100 പേരെ അറസ്റ്റ് ചെയ്തിട്ടുണ്ട്. സംഭവസ്ഥലത്തുനിന്ന് 200 സ്‌ഫോടക സാമഗ്രികളും 30 കാറുകളും ബൈക്കുകളും പിടിച്ചെടുത്തിട്ടുണ്ട്. കൊല്ലപ്പെട്ടവരുടെയോ പിടിയിലായവരുടെയോ പേരുവിവരങ്ങളും പുറത്തുവിട്ടിട്ടില്ല. നിരോധിത സംഘടനകള്‍ക്കെതിരായ നടപടികളുടെ പേരില്‍ ഈജിപ്തിലെ പട്ടാളഭരണകൂടം നിരപരാധികളെ വേട്ടയാടുകയാണെന്നും വ്യാജഏറ്റുമുട്ടല്‍ നടത്തുകയാണെന്നും രാജ്യാന്തരമനുഷ്യാവകാശ സംഘടനകള്‍ ആരോപിച്ചിട്ടുണ്ട്.