പൂക്കോട്ടുംപാടം: കാറ്റിലും മഴയിലും വ്യാപക നാശനഷ്ടം. അമരമ്പലം പഞ്ചായത്തിലെ വിവിധ പ്രദേശങ്ങളില്‍ വീടുകളും, കെട്ടിടങ്ങളും ഭാഗികമായി തകര്‍ന്നു. ഞായറാഴ്ച്ച ഉച്ചയ്ക്കു രണ്ടോടെ വീശിയടിച്ച കാറ്റില്‍ തട്ടിയേക്കല്‍ മാളിയേക്കല്‍ മുഹമ്മദ്, കാഞ്ഞിരംപാടം കദീജ എന്നിവരുടെ വീടിനു മുകളില്‍ തേക്ക് മരം വീണ് ഭാഗികമായി തകര്‍ന്നു. പൂക്കോട്ടുംപാടം അങ്ങാടിയില്‍ വര്‍ക്ക് ഷോപ്പ് ബില്‍ഡിങിന് മുകളില്‍ മരം വീണു തകര്‍ന്നു. അവധി ദിനമായതിനാല്‍ അപകടമൊഴിവായി. പൂക്കോട്ടുംപാടം ഗവ ഹയര്‍ സെക്കന്‍ഡറി സ്‌കൂളില്‍ കെട്ടിടത്തിന്റെ മേല്‍ക്കൂര തകര്‍ന്നു. വില്ലൂത്ത് ക്ഷേത്രത്തിലെ നടപന്തലിന്റെ ആസ്ബറ്റോസ് ഷീറ്റുകളും നാലമ്പലത്തിന്റെ ഓടുകളും കാറ്റില്‍ പറന്നു പോയി. ക്ഷേത്രത്തിനു മുന്നിലെ മരം കടപുഴകി വീണു. പായമ്പാടം മൂച്ചിക്കലില്‍ ഇലവന്‍ കെ.വി ലൈനിന് മുകളില്‍ മരം വീണ് നിലമ്പൂര്‍ പെരിമ്പിലാവ് സംസ്ഥാന പാതയില്‍ ഗതാഗതം തടസപ്പെട്ടു.