ശാസ്താംകോട്ട: മൈനാഗപ്പള്ളിയില്‍ പതിനാലുകാരിയേയും സഹോദരിയേയും പീഡിപ്പിച്ച കേസില്‍ നാലുപേരെക്കൂടി ശാസ്താംകോട്ട പൊലിസ് അറസ്റ്റ് ചെയ്തു. കൊല്ലം പള്ളമണ്‍ പുലിയില വീട്ടില്‍ സച്ചിന്‍(21), അഞ്ചല്‍ പെരുങ്ങള്ളൂര്‍ മാങ്കുളം ലക്ഷംവീട് കോളനിയില്‍ ശരത്(20), ആലപ്പുഴ കാര്‍ത്തികപ്പള്ളി വി.ബി ഹൗസില്‍ വിപിന്‍(19), മൈനാഗപ്പള്ളി വരിക്കോലയ്യത്ത് ലക്ഷംവീട്ടില്‍ അബ്ദുല്‍ നിസാര്‍(43) എന്നിവരാണ് അറസ്റ്റിലായത്.
അബ്ദുല്‍ നിസാര്‍ പെണ്‍കുട്ടികളുടെ അടുത്ത ബന്ധുവാണ്. കേസിലെ പ്രധാനപ്രതി റംസീനയെ നേരത്തെ അറസ്റ്റ് ചെയ്തിരുന്നു. കഴിഞ്ഞ നാലിനാണ് മൈനാഗപ്പള്ളിയില്‍ പതിനാലുകാരി ആത്മഹത്യ ചെയ്ത സംഭവമുണ്ടായത്. മൃതദേഹം മെഡിക്കല്‍ കോളജില്‍ പോസ്റ്റ്‌മോര്‍ട്ടം ചെയ്ത ശേഷമാണ് പീഡന വിവരം പുറത്തറിയുന്നത്. തുടര്‍ന്ന് സഹോദരിയെ ചോദ്യം ചെയ്യുകയും കൗണ്‍സിലിംഗിന് വിധേയമാക്കുകയും ചെയ്തിരുന്നു. ഇവരുടെ സമീപവാസിയായ റംസീന എന്ന യുവതി തങ്ങളെ വീട്ടില്‍ നിന്ന് കൂട്ടിക്കൊണ്ടുപോവുകയും കൊല്ലം, തിരുവനന്തപുരം, ഏര്‍വാടി തുടങ്ങിയ സ്ഥലങ്ങളിലെത്തിച്ച് പീഡിപ്പിച്ചിരുന്നുവെന്ന മൂത്ത കുട്ടി മൊഴി നല്‍കി. കൂടുതല്‍ പ്രതികള്‍ ഇനിയും അറസ്റ്റിലാകുമെന്ന് പൊലിസ് അറിയിച്ചു.