ജിദ്ദ : സഊദി വിമാനത്താവളത്തില്‍ കുട്ടിയെ മാതാവ് മറന്നുപോയതിനാല്‍ സഊദി വിമാനം അടിയന്തരമായി തിരിച്ചിറക്കി. ജിദ്ദ കിങ് അബ്ദുല്‍ അസീസ് രാജ്യാന്തര വിമാനത്താവളത്തില്‍ നിന്ന് ക്വാലാലംപൂരിലേക്ക് പറന്ന എസ്.വി 832 വിമാനമാണ് അടിയന്തരമായി തിരിച്ചിറക്കിയത്.

വിമാനത്തിലുണ്ടായിരുന്ന മാതാവ് വിമാനം പറന്നുയര്‍ന്ന ശേഷം തന്റെ കുഞ്ഞിനെ വിമാനത്താവളത്തില്‍ മറന്ന കാര്യം അറിയിക്കുകയായിരുന്നു. ഉടന്‍ പൈലറ്റ് വിമാനത്താവളത്തിലെ ഓപറേഷന്‍ മുറിയുമായി ബന്ധപ്പെട്ട് അനുവാദം വാങ്ങിയ ശേഷം വിമാനം കിങ് അബ്ദുല്‍ അസീസ് രാജ്യാന്തര വിമാനത്താവളത്തില്‍ തന്നെ തിരിച്ചിറക്കുകയായിരുന്നു. അതേസമയം വിമാനം തിരിച്ചിറക്കാനുള്ള അനുമതി ചോദിച്ചു പൈലറ്റ് വിമാനത്താവളത്തിലെ എ.ടി.സി ഓപറേഷനിലേയ്ക്ക് നല്‍കിയ സന്ദേശം സമൂഹമാധ്യമങ്ങളില്‍ വൈറലായി.

വിമാനം യാത്ര തുടരാന്‍ യാത്രക്കാരി സമ്മതിക്കുന്നില്ലെന്ന് പൈലറ്റ് പറയുന്നു. ശരി, തിരിച്ചിറക്കിക്കോളൂ, തങ്ങള്‍ക്കിത് ആദ്യത്തെ സംഭവമാണെന്നു പറഞ്ഞ് ഓപറേഷന്‍ മുറിയിലെ ഉദ്യോഗസ്ഥര്‍ അനുമതി നല്‍കുന്നു. കുഞ്ഞ് വിമാനത്തില്‍ ഇല്ലെന്ന കാര്യം ഒന്നുകൂടി ഉറപ്പാക്കാന്‍ ഓപ്പറേറ്റര്‍ നിര്‍ദേശിക്കുന്നതുമായ സംസാരത്തിന്റെ വിഡിയോയാണ് പുറത്തു വന്നിരിക്കുന്നത്.
ഈ സംഭാഷണ വിഡിയോ ആണ് ഇപ്പോള്‍ വൈറലായിരിക്കുന്നത്. അതിനിടെ യാത്രക്കാരിയുടെ സ്ഥിതിവിശേഷത്തെ അടിയന്തരമായി പരിഗണിച്ച പൈലറ്റിന് സമൂഹ മാധ്യമങ്ങളില്‍ നിറഞ്ഞ കൈയടിയാണ് ഇപ്പോള്‍ ലഭിക്കുന്നത്. എന്തായാലും മറന്നു പോയ കുഞ്ഞിനെ തിരിച്ചെടുത്താണ് യുവതി പിന്നീട് യാത്ര തുടര്‍ന്നത്.