കയ്പ്പമംഗലം : കള്ളുഷാപ്പില്‍ വച്ച് വാക്കുതര്‍ക്കത്തെ തുടര്‍ന്ന് സുഹൃത്തിനെ കുത്തിയ പരുക്കേല്‍പ്പിച്ച പ്രതി പിടിയിലായി. ഓണച്ചമ്മാവ് ഇറ്റി കോളനിയില്‍ കാതിക്കൂടത്ത് നാരായണന്‍ മകന്‍ ബാബു എന്ന കണ്ടന്‍ ബാബുവിനെയാണ് (40) എസ്.ഐ വി.ശശികുമാര്‍ അറസ്റ്റു ചെയ്തത്. ഇയാളുടെ സുഹൃത്ത് എസ്.എന്‍ പുരത്തു തട്ടുകട നടത്തുന്ന സബിത്ത് കുമാറിനാണ് കുത്തേറ്റത്. ഇയാള്‍ തൃശൂര്‍ മെഡിക്കല്‍ കോളജ് ആശുപത്രിയില്‍ തീവ്രപരിചരണ വിഭാഗത്തില്‍ ചികിത്സയിലാണ്. സ്‌ക്രൂ ഡ്രൈവര്‍ ഉപയോഗിച്ചാണ് കുത്തിയത് എന്നു പറഞ്ഞ ഇയാള്‍ ഇന്ന് ഇരിങ്ങാലക്കുട ഡിവൈ.എസ്.പി ഫേമസ് വര്‍ഗീസ്, ഇന്‍സ്‌പെക്ടര്‍ പി.സി ബിജുകുമാര്‍ എന്നിവരുടെ നേതൃത്വത്തില്‍ ചോദ്യം ചെയ്യലില്‍ തട്ടുകടയില്‍ ഉപയോഗിക്കുന്ന കത്തി ഉപയോഗിച്ചാണ് കുത്തിയതെന്നു സമ്മതിച്ചു.
സംഭവ സ്ഥലത്തു നിന്നും കുറച്ചു മാറി റോഡരികിലെ കുറ്റിക്കാട്ടില്‍ നിന്നു കുത്താനുപാേഗിച്ച കത്തി കണ്ടെടുത്തു. സബിത്തിന്റെ തട്ടുകടയില്‍ സഹായിയായി നില്‍ക്കുന്ന പ്രതി സബിത്തിന്റെ ബൈക്ക് എടുത്ത് മറ്റൊരു സുഹൃത്തിനൊപ്പം മദ്യപിക്കാന്‍ പോയി തിരിച്ചെത്താന്‍ വൈകിയത് ചോദ്യം ചെയ്തതിനെ തുടര്‍ന്നുള്ള തര്‍ക്കമാണ് കത്തിക്കുത്തില്‍ കലാശിച്ചത്.