തിരുവനന്തപുരം: കൊവിഡ് ലോക്ക്ഡൗണിന്റെ പശ്ചാത്തലത്തില്‍ സംസ്ഥാനത്ത് ഓണ്‍ലൈന്‍ ക്ലാസുകള്‍ തുടങ്ങാനിരിക്കെ രണ്ടര ലക്ഷത്തിലേറെ വിദ്യാര്‍ഥികള്‍ക്ക് ഇതിനുള്ള സൗകര്യങ്ങളില്ല.
2.61 ലക്ഷം വിദ്യാര്‍ഥികള്‍ക്ക് വീട്ടില്‍ ടിവിയോ ഇന്റര്‍നെറ്റ് സൗകര്യമോ ഇല്ലെന്ന് സര്‍വേ ഫലം.
ജൂണ്‍ മാസം മുതല്‍ ഓണ്‍ലൈന്‍ ക്ലാസുകള്‍ തുടങ്ങാനിരിക്കെ, വിദ്യാഭ്യാസ വകുപ്പ് നടത്തിയ വിവരശേഖരണത്തിലാണ് കണ്ടെത്തല്‍. കൊവിഡ് ഭീഷണിയില്‍ ജൂണ്‍ ഒന്നിന് സ്‌കൂള്‍ തുറക്കാന്‍ കഴിയാതെ വന്നാല്‍ വിക്ടേഴ്‌സ് ടിവി ചാനല്‍, വിക്ടേഴ്‌സ് ഓണ്‍ലൈന്‍ ചാനല്‍, യൂട്യൂബ് എന്നിവയിലൂടെ ഓണ്‍ലൈന്‍ ക്ലാസുകള്‍ തുടങ്ങാനാണ് സര്‍ക്കാര്‍ തീരുമാനം. ഇതിനായി എസ്.സി.ഇ.ആര്‍.ടി, കൈറ്റ് എന്നിവയുടെ നേതൃത്വത്തില്‍ ഒരുക്കങ്ങള്‍ തുടങ്ങി.
സംസ്ഥാനത്തെ സര്‍ക്കാര്‍ സ്‌കൂളുകളില്‍ പ്രീ പ്രൈമറി മുതല്‍ പ്ലസ് ടു വരെ പഠിക്കുന്ന 43 ലക്ഷം വിദ്യാര്‍ഥികളില്‍നിന്നാണ് സമഗ്ര ശിക്ഷ കേരളം വിവരശേഖരണം നടത്തിയത്.
ഇവരില്‍ 2,61,000 വിദ്യാര്‍ഥികള്‍ക്ക് ഓണ്‍ലൈന്‍ ക്ലാസുകള്‍ കിട്ടുന്നതിനുള്ള സൗകര്യമില്ല. ആകെ വിദ്യാര്‍ഥികളില്‍ ആറു ശതമാനം പേര്‍ക്കാണ് വീട്ടില്‍ ടിവിയോ ഇന്റര്‍നെറ്റ് സൗകര്യമോ ഇല്ലാത്തത്.
സൗകര്യങ്ങളില്ലാത്ത വിദ്യാര്‍ഥികള്‍ കൂടുതലുള്ളത് വയനാട് ജില്ലയിലാണ്, 21,653 പേര്‍.
വയനാട്ടിലെ പൊതുവിദ്യാലയങ്ങളിലുള്ള ആകെ വിദ്യാര്‍ഥികളുടെ 15 ശതമാനമാണിത്. പാലക്കാട്, മലപ്പുറം ജില്ലകളിലെ ആകെ കുട്ടികളില്‍ 7.5 ശതമാനം പേര്‍ക്കും സൗകര്യമില്ല. അതേസമയം എയ്ഡഡ് വിദ്യാലയങ്ങളുടെ കൂടി കണക്കെടുത്താല്‍ ഓണ്‍ലൈന്‍ പഠനത്തിന് സൗകര്യമില്ലാത്ത വിദ്യാര്‍ഥികളുടെ എണ്ണം ഇനിയും കൂടും. ഇവര്‍ക്കായി പകരം സംവിധാനം ആലോചിക്കുകയാണ് അധികൃതര്‍.