ബസ് ചാര്‍ജ് വര്‍ധന മാത്രം പോരെന്ന് ഉടമകള്‍

തിരുവനന്തപുരം: ലോക്ക്ഡൗണിന് കേന്ദ്ര സര്‍ക്കാര്‍ പ്രഖ്യാപിച്ച ഇളവുകളുടെ അടിസ്ഥാനത്തില്‍ സംസ്ഥാനത്തും ഇളവുകള്‍ വന്നെങ്കിലും പൊതുഗതാഗത സംവിധാനം നേരെയാകുന്നത് ഇനിയും വൈകും.
സംസ്ഥാനത്തിന്റെ കോവിഡ് സാഹചര്യം പരിശോധിച്ചു മാത്രമേ പൊതു ഗതാഗതം പുനഃസ്ഥാപിക്കൂ എന്നാണ് ഇന്നലെ ഗതാഗതമന്ത്രി എ.കെ ശശീന്ദ്രന്‍ പറഞ്ഞത്.
ജില്ലകള്‍ക്കുള്ളില്‍ ബസ് സര്‍വിസുകള്‍ ആരംഭിക്കാന്‍ അനുമതിയുണ്ടെങ്കിലും ജില്ലകള്‍ക്കു പുറത്തേക്കു പോകില്ല. എന്നാല്‍ ബസ് ചാര്‍ജ് വര്‍ധനകൊണ്ടു മാത്രം പ്രശ്‌നങ്ങള്‍ പരിഹരിക്കപ്പെടില്ലെന്നാണ് ബസുടമകളുടെ സംഘടന പറയുന്നത്.
നികുതിയിളവും ഡീസല്‍ സബ്‌സിഡിയും നല്‍കണമെന്നാണ് അവരുടെ ആവശ്യം. ഇരട്ടി ചാര്‍ജ് ഏര്‍പെടുത്തണമെന്ന അവരുടെ ആവശ്യവും സര്‍ക്കാര്‍ പരിഗണിച്ചിട്ടില്ലാത്ത സാഹചര്യത്തില്‍ ബസുടമകള്‍ എന്തു തീരുമാനമെടുക്കുമെന്ന് കണ്ടറിയണം.
മറ്റു സംസ്ഥാനങ്ങളുമായി ആലോചിച്ച് അന്തര്‍സംസ്ഥാന ബസ് സര്‍വിസ് ആരംഭിക്കുന്ന കാര്യം തീരുമാനിക്കുമെന്ന് ഗാതഗത മന്ത്രി പറഞ്ഞു. സത്യവാങ്മൂലം കൈയില്‍ കരുതി മറ്റു ജില്ലകളിലേക്ക് ബസുകളില്‍ യാത്ര ചെയ്യാനുള്ള സംവിധാനം ഒരുക്കാനാവുമോ എന്ന് ആലോചിക്കുന്നുമുണ്ട്. ഇതിനായി പരിശോധനാ സംവിധാനങ്ങള്‍ കര്‍ശനമാക്കേണ്ടിവരുമെന്നും മന്ത്രി പറഞ്ഞു.