ആര്‍പ്പൂക്കര: കോട്ടയം മെഡിക്കല്‍ കോളജ് ആശുപത്രിയില്‍ രോഗിയുടെ കൂട്ടിരുപ്പുകാര്‍ തമ്മില്‍ സംഘര്‍ഷമുണ്ടായതിനെ തുടര്‍ന്ന് രണ്ടുപേരെ പൊലിസ് പിടികൂടി.
 റാന്നി അമ്മിണി ഭവനത്തില്‍ രാജേഷ്(34),ചിങ്ങവനം സ്വദേശി സനീഷ്(27) എന്നിവരെയാണ് പൊലിസ് കസ്റ്റെഡിയിലെടുത്തത്.ഇവരുടെ ഭാര്യമാര്‍ ആശുപത്രിയില്‍ ചികിത്സയിലായതിനാല്‍ ഇരുവരെയും പിന്നീട് വിട്ടയച്ചു. ഇന്നലെ രാവിലെ എട്ടിന് ആശുപത്രിയിലെ പന്ത്രണ്ടാം വാര്‍ഡിലായിരുന്നു  സംഭവം. രാജേഷിന്റെ ഭാര്യ സുമയും സനീഷിന്റെ ഭാര്യ പ്രസീതയും 12-ാം വാര്‍ഡില്‍ ചികിത്സയിലാണ്.
രാജേഷിന്റെ രണ്ടു കുട്ടികളും അമ്മയ്‌ക്കൊപ്പം ആശുപത്രിയിലുണ്ടെങ്കിലും കുട്ടികളെയോ ഭാര്യയെയോ പരിചരിക്കാനോ ഇയാള്‍ ശ്രദ്ധ പുലര്‍ത്തിയിരുന്നില്ല. രാവിലെ വാര്‍ഡില്‍ എത്തിവന്നു പോയാല്‍ പിന്നീട് രാത്രിയിലാകും വീണ്ടും വരിക.
ഇയാളുടെ രോഗിയായ ഭാര്യയും കുട്ടികളും ഭക്ഷണം കഴിക്കാതെ ബുദ്ധിമുട്ടുന്നത് കണ്ട് മറ്റു രോഗികളുടെ ബന്ധുക്കള്‍ ഇവര്‍ക്ക് ഭക്ഷണം നല്‍കിയിരുന്നു.
ഇതിനിടെ മറ്റു രോഗികളുടെ കൂട്ടിരിപ്പുകാര്‍ രാജേഷിന്റെ സാമ്പത്തിക ബുദ്ധിമുട്ട് മനസിലാക്കി ഇവരെ സഹായിച്ചിരുന്നു.ഒരാള്‍ 2000 രൂപ രണ്ടു തവണകളായി കടം നല്‍കി.
ആശുപത്രിയിലുള്ളവര്‍ ഇയാളെ സാമ്പത്തികമായി സഹായിച്ചിട്ടും രാജേഷ് രോഗിയായ ഭാര്യയ്‌ക്കോ മക്കള്‍ക്കോ ഭക്ഷണം പോലും വാങ്ങി നല്‍കാന്‍ തയാറായില്ല.തുടര്‍ന്ന് തിങ്കളാഴ്ച്ച സനീഷിന്റെ നേതൃത്വത്തില്‍ ആശുപത്രി പൊലിസ് എയ്ഡ് പോസ്റ്റിലെത്തി രാജേഷിനെതിരെ പരാതിപ്പെട്ടു.
ഇതോടെയാണ് സംഘര്‍ഷത്തിന് തുടക്കമായത്. പരാതിപ്പെട്ട വിവരമറിഞ്ഞ രാജേഷ് സനീഷിനെ അസഭ്യം പറയുകയും മര്‍ദ്ദിക്കാന്‍ ശ്രമം നടത്തുകയും ചെയ്തു.
മറ്റുള്ളവര്‍ ഇടപെട്ട് സംഘര്‍ഷം ഒഴിവാക്കിയെങ്കിലും രാജേഷിന്റെ ഭാര്യ അമ്മിണിയും മകന് അനുകൂലമായ നിലപാടിലായിരുന്നു. ഇവരും മറ്റുള്ളവരോട് ദേഷ്യപ്പെട്ടു.തുടര്‍ന്ന് വാര്‍ഡ് ജീവനക്കാര്‍ അറിയിച്ചതിനെ തുടര്‍ന്നാണ് പൊലിസെത്തി ഇരുകൂട്ടരെയും കസ്റ്റഡിയിലെടുത്തത്.