ദുബായ്: പ്രഫഷണലുകള്‍ക്കും നിക്ഷേപകര്‍ക്കും 10 വര്‍ഷത്തേക്കുള്ള വിസ നല്‍കുവാന്‍ യു.എ.ഇ മന്ത്രിസഭ അംഗീകാരം നല്‍കി. ഇതിനുള്ള അപേക്ഷകള്‍ ഉടന്‍ തന്നെ യു.എ.ഇ റെസിഡന്‍സി വകുപ്പുകള്‍ സ്വീകരിച്ചു തുടങ്ങുമെന്ന് യു.എ.ഇ ഭരണാധികാരി ട്വീറ്റ് ചെയ്തു.

കഴിഞ്ഞ വര്‍ഷം നിക്ഷേപകര്‍ക്ക് പുറമെ ഡോക്ടര്‍മാര്‍, ശാസ്ത്രജ്ഞര്‍ വിവിധ മേഖലകളില്‍ നൈപുണ്യമുള്ളവര്‍ എന്നിവര്‍ക്കും 10 വര്‍ഷത്തേക്കുള്ള വിസ നല്‍കാന്‍ യു.എ.ഇ ഭരണകൂടം തീരുമാനിച്ചിരുന്നു. ഈ ആനുകൂല്യം ലഭിക്കുന്നവരുടെ മക്കള്‍ക്ക് യു.എ.ഇയില്‍ പഠിക്കാനുമുള്ള അനുമതിയുമുണ്ടാകും.

50 ലക്ഷം ദിര്‍ഹത്തില്‍ കൂടുതല്‍ നിക്ഷേപമുള്ളവര്‍ക്ക് അഞ്ചു വര്‍ഷത്തേക്കും ഒരു കോടി ദിര്‍ഹം നിക്ഷേപമുള്ള സ്ഥാപനങ്ങള്‍ക്ക് 10 വര്‍ഷത്തേക്കുമാണ് വിസ ലഭിക്കുക. നിക്ഷേപിക്കാനുള്ള പണം കടമെടുക്കാനോ മൂന്ന് വര്‍ഷത്തേക്ക് പിന്‍വലിക്കാനോ പാടില്ലെന്ന് കര്‍ശന നിബന്ധനയുണ്ട്.