വോള്‍ഗോഗ്രാഡ് അരീന: അവസാന മിനുട്ടിലെ ഗോള്‍ഭൂതം ഈജിപ്തിനെയും വേട്ടയാടി. ഗ്രൂപ്പ് എയിലെ അവസാന മത്സരത്തില്‍ സഊദിയാണ് ഒന്നിനെതിരേ രണ്ട് ഗോളുകള്‍ക്ക് ഈജിപ്തിനെ തകര്‍ത്തത്. 22ാം മിനുട്ടില്‍ മുഹമ്മദ് സലാഹിലൂടെ മുന്‍പിലെത്തിയെങ്കിലും ഈജിപതിന് സഊദിയുടെ ആക്രമണ ഫുട്‌ബോളിനെ തടയാനായില്ല. സഊദിക്ക് വേണ്ടി സല്‍മാന്‍ അല്‍ ഫറജും സലീം അല്‍ ദൗസരിയും ഗോള്‍ നേടി. ഗോള്‍കീപ്പര്‍ എല്‍ഹദരിയുടെ മിന്നും സേവുകളാണ് ഈജിപ്തിനെ ഒരു വലിയ തോല്‍വിയില്‍ നിന്നും കരകയറ്റിയത്. എട്ടു ഷോട്ടുകളാണ് സഊദി ഈജിപ്ത് ഗോള്‍വല ലക്ഷ്യമാക്കി തൊടുത്തുവിട്ടത്. അതില്‍ രണ്ടെണ്ണം ലക്ഷ്യം കണ്ടു. 

പന്തടക്കത്തില്‍ മുന്നിട്ടു നിന്ന സഊദി ഈജിപ്ത് പ്രതിരോധത്തിന് വലിയ തലവേദനയുണ്ടാക്കി. സമനിലയിലേക്ക് പോകുമെന്ന ഘട്ടത്തിലാണ് 95ാം മിനുട്ടില്‍ സലീം അല്‍ ദൗസരി ഗോള്‍ നേടിയത്. മനോഹരമായ നീക്കത്തിനൊടുവില്‍ ബോക്‌സിനുള്ളില്‍ നിന്ന് ഒരു ബുള്ളറ്റ് ഷോട്ടിലൂടെ താരം ഗോള്‍ നേടുകയായിരുന്നു. ആദ്യ കളിയില്‍ റഷ്യയോട് അഞ്ചു ഗോളുകള്‍ക്ക് പരാജയപ്പെട്ട സഊദി പിന്നീടുള്ള മത്സരങ്ങളില്‍ ശക്തമായ തിരിച്ചുവരവാണ് നടത്തിയത്. രണ്ടാം മത്സരത്തില്‍ ഉറുഗ്വെയെ വിറപ്പിച്ചെങ്കിലും ഒരു ഗോളിന് കീഴടങ്ങേണ്ടി വന്നു.
ഏതായാലും അവസാന മത്സരത്തില്‍ വിജയിച്ചാണ് സഊദി മടങ്ങുന്നത്. ജയത്തോടെ മൂന്ന് പോയിന്റ് നേടിയെങ്കിലും സഊദി പുറത്തായി. ഗ്രൂപ്പ് എയില്‍ നിന്ന് ആറു പോയിന്റുമായി റഷ്യയും ഒന്‍പത് പോയിന്റുമായി ഉറുഗ്വെയുമാണ് പ്രീക്വാര്‍ട്ടറില്‍ പ്രവേശിച്ചത്.