കൊച്ചി: ഇന്ന് ആര്യനന്ദയുടെ നാലാം പിറന്നാള്‍; കഴിഞ്ഞ തവണത്തെ പോലെ തുരുതുരെ പിറന്നാള്‍ ഉമ്മ നല്‍കാനും പുത്തനുടുപ്പ് സമ്മാനിക്കാനും അവള്‍ക്കൊപ്പം ഇന്ന് അച്ഛനില്ല. എല്ലാ പെണ്‍കുഞ്ഞുങ്ങളെയും പോലെ അവള്‍ക്കും കളിക്കൂട്ടുകാരനായിരുന്നു അവളുടെ അച്ഛന്‍.

ആദ്യമൊക്കെ അവള്‍ അച്ഛനെ ചോദിച്ച് അമ്മ അഖിലയോട് വഴക്കുകൂടുമായിരുന്നു, പക്ഷേ ഇപ്പോള്‍ അവളും പറയുന്നു; അര്‍ഥമറിയാതെ, ആഴമറിയാതെ അച്ഛന്‍ മരിച്ചുപോയെന്ന്. വരാപ്പുഴയില്‍ പൊലിസ് കസ്റ്റഡിയില്‍ കൊല്ലപ്പെട്ട ശ്രീജിത്തിന്റെ ഏകമകളാണ് ആര്യനന്ദ. 2014 ജൂണ്‍ 26നായിരുന്നു ആര്യനന്ദയുടെ ജനം. പിന്നീടിങ്ങോട്ട് മകളുടെ മൂന്നു ജന്മദിനങ്ങളും ശ്രീജിത്തിന് ആഘോഷമായിരുന്നു. കേക്ക് മുറിച്ചും അടുത്ത ബന്ധുങ്ങള്‍ക്കും സുഹൃത്തുക്കള്‍ക്കും സദ്യ ഒരുക്കിയുമൊക്കെയായിരുന്നു ആഘോഷം.

ശ്രീജിത്തില്ലാതെ എന്ത് ആഘോഷമെന്ന് ഇന്ന് അഖില ചോദിക്കുന്നു. ഞങ്ങളുടെ ആഘോഷമൊക്കെ തല്ലിത്തകര്‍ത്തില്ലെ ? പറിച്ചെടുത്തില്ലെ എന്റെ പ്രാണനെ? അപ്പനെക്കുറിച്ചാണ് പറയുന്നതെന്ന് മനസിലാക്കിയിട്ടാവാം ആര്യനന്ദ തന്റെ സ്‌കൂള്‍ ബാഗ് പതുക്കെ തുറന്നു പിന്നെ അതിന്റെ ഒരു അറയില്‍ കാത്തുസൂക്ഷിച്ച ഏതോ പത്രത്തില്‍ വാര്‍ത്തയ്‌ക്കൊപ്പം വന്ന ശ്രീജിത്തിന്റെ പടം എടുത്ത് കുഞ്ഞുകൈകള്‍കൊണ്ട് തലോടി പിന്നെ മുഖത്തോട് ചേര്‍ത്ത് പിടിച്ച് ചുംബിച്ചു. അതുകണ്ടപ്പോള്‍ അഖിലയ്ക്ക് സങ്കടം അടക്കാന്‍ കഴിഞ്ഞില്ല. ആര്യനന്ദ തന്നെയാണ് വാര്‍ത്തക്കൊപ്പം പത്രത്തില്‍വന്ന ശ്രീജിത്തിന്റെ പടം കീറി ബാഗില്‍ സൂക്ഷിച്ചത്. ആദ്യം അങ്കണവാടിയിലെ ബാഗിലായിരുന്നു പടം.

എല്‍.കെ.ജിയിലേക്ക് മാറിയപ്പോള്‍ പുതിയ ബാഗിലേക്ക് മാറ്റുകയായിരുന്നു. എപ്പോഴും എടുത്ത് നോക്കിയും ചുംബിച്ചുമൊക്കെ പത്രകട്ടിങ് അല്‍പം മോശമായെങ്കിലും അവള്‍ക്കത് നിധിയാണ്. അവള്‍ക്കൊപ്പം ബാഗിലുള്ള അച്ഛന്‍ പിറന്നാള്‍ സമ്മാനവുമായി എത്തില്ലെന്നും മിഠായി വാങ്ങിത്തരില്ലെന്നുമൊക്കെ അവള്‍ക്ക് അറിയാം, അവളുടെ അമ്മ അവളെ എല്ലാം പറഞ്ഞുപഠിപ്പിച്ചിരിക്കുന്നു.