കോഴിക്കോട്: ലോക്ക്ഡൗണില്‍ സര്‍ക്കാര്‍ ഇളവുവരുത്തിയ സാഹചര്യത്തില്‍ സംസ്ഥാനത്തെ  ജ്വല്ലറികള്‍ ഇന്നുമുതല്‍ തുറന്നുപ്രവര്‍ത്തിക്കുമെന്നു കേരള ജ്വല്ലേഴ്‌സ് അസോസിയേഷന്‍ കോഡിനേഷന്‍ കമ്മിറ്റി അറിയിച്ചു. സര്‍ക്കാര്‍ നിര്‍ദ്ദേശമനുസരിച്ചുള്ള സുരക്ഷാക്രമീകരണങ്ങള്‍ ഉറപ്പുവരുത്തും. 

ഷോറൂമുകളെല്ലാം അണുവിമുക്തമാക്കിയിട്ടുണ്ട്. ഇടപാടുകാരും ജീവനക്കാരും സാമൂഹിക അകലം പാലിക്കുന്നുണ്ടെന്ന് ഉറപ്പാക്കും. ജ്വല്ലറികളില്‍ സാനിറ്റെസറുകള്‍ സജ്ജമാക്കും. ജീവനക്കാര്‍ മാസ്‌ക് ധരിക്കും. ഉപഭോക്താക്കളും മാസ്‌ക് ധരിക്കണമെന്ന് അഭ്യര്‍ത്ഥിക്കുന്നു.രണ്ടുമാസത്തോളം അടച്ചിട്ടതു കാരണം സ്വര്‍ണവ്യാപാര മേഖല കടുത്ത പ്രതിസന്ധി നേരിടുകയാണ്. വാടകയിനത്തിലും ജീവനക്കാരുടെ ശമ്പളയിനത്തിലും വായ്പാ പലിശയിനത്തിലും മറ്റും കോടികളുടെ ബാധ്യത ഓരോ ജ്വല്ലറി ഉടമയ്ക്കുമുണ്ട്.

ചെയര്‍മാന്‍ ബി.ഗിരിരാജന്‍ അധ്യക്ഷത വഹിച്ചു. കണ്‍വീനര്‍ എം.പി അഹമ്മദ്, ഡോ: ബി. ഗോവിന്ദന്‍, ടി.എസ് കല്യാണരാമന്‍, ജോയ് ആലൂക്കാസ്, ബാബു എം.ഫിലിപ്പ്, ജസ്റ്റിന്‍ പാലത്ര, കെ.സുരേന്ദ്രന്‍, ഷാജു ചിറയത്ത്, രാജീവ് പോള്‍ ചുങ്കത്ത്, അഡ്വ. എസ്. അബ്ദുല്‍ നാസര്‍ എന്നിവര്‍ പ്രസംഗിച്ചു.