ന്യൂഡല്‍ഹി: അതിഥി തൊഴിലാളികളെ നാട്ടിലെത്തിക്കാനുള്ള ശ്രമിക് സ്‌പെഷ്യല്‍ ട്രെയിനുകള്‍ ഓടിക്കാന്‍ എത്തിച്ചേരേണ്ട സംസ്ഥാനങ്ങളുടെ സമ്മതം ആവശ്യമാണെന്ന വ്യവസ്ഥ ഒഴിവാക്കി കേന്ദ്ര ആഭ്യന്തര മന്ത്രാലയം പുതിയ മാര്‍ഗരേഖ പുറത്തിറക്കി. 

ലോക്ക്ഡൗണ്‍ നീട്ടിയതിനു പിന്നാലെ കുടുങ്ങിക്കിടക്കുന്ന തൊഴിലാളികളുടെ യാത്രയുമായി ബന്ധപ്പെട്ട് പുറത്തിറക്കിയ പുതിയ മാര്‍ഗരേഖയിലാണ് സംസ്ഥാനങ്ങളുടെ അനുമതി വേണമെന്ന ആവശ്യം ഒഴിവാക്കിയിരിക്കുന്നത്. 

കേരളത്തിലേക്ക് 

ഇന്ന് വൈകിട്ട് ആറു മണിക്ക്

വിദ്യാര്‍ഥികള്‍ ഉള്‍പ്പടെയുള്ളവരുമായി കേരളത്തിലേയ്ക്കുള്ള ശ്രമിക് ട്രെയിന്‍ ഇന്ന് വൈകിട്ട് ആറു മണിക്ക് ന്യൂഡല്‍ഹി റെയില്‍വേ സ്റ്റേഷനില്‍നിന്ന് പുറപ്പെടും. 

1304 യാത്രക്കാരുടെ പട്ടികയാണ് ഇതിനായി തയാറാക്കിയിട്ടുള്ളത്. 971 യാത്രക്കാര്‍ ഡല്‍ഹിയില്‍നിന്നും 333 പേര്‍ യുപി, ജമ്മു-കശ്മിര്‍, ഹരിയാന, ഹിമാചല്‍ പ്രദേശ്, ഉത്തരാഖണ്ഡ് എന്നിവിടങ്ങളില്‍നിന്നുമായാണ്. 975 രൂപയാണ് ഒരു യാത്രക്കാരനില്‍നിന്ന് ഈടാക്കുന്നത്.