നിലമ്പൂര്‍: വിഷുവിന് പടക്കവിപണി സജീവം. മണിക്കൂറുകള്‍ മാത്രം ശേഷിക്കെ വിവിധ ഇനങ്ങളുമായാണ് നാടെങ്ങും പടക്ക വിപണിയും തയാറായിരിക്കുന്നത്. കാഴ്ചക്കു മാത്രമായ ഇനങ്ങളാണ് പതുക്കെ അനക്കംവച്ചു തുടങ്ങുന്ന വിപണിയില്‍ നേരത്തെ വിറ്റു പോകുന്നത്.
അതു കൊണ്ടു തന്നെ വര്‍ണ കാഴ്ചകളൊരുക്കുന്ന ചൈനീസ് ഇനങ്ങള്‍ക്കു തന്നെയാണ് ഇത്തവണയും വ്യാപാരികള്‍ മുന്‍തൂക്കം നല്‍കിയിരിക്കുന്നു. വലിയ കളര്‍ റോക്കറ്റ്, വലിയ ചൈനീസ് പൂവ് തുടങ്ങിയവയാണ് ഇതില്‍ പ്രധാനികള്‍. ശിവകാശിയിലെ അയ്യന്‍സ്, സ്റ്റാന്റേര്‍ഡ് വനിത കാളീശ്വരി, തുടങ്ങിയ പ്രമുഖ കമ്പനികളില്‍ നിന്നും നേരിട്ടാണ് പടക്കങ്ങള്‍ എത്തിയിട്ടുള്ളത്.
മുന്‍വര്‍ഷങ്ങളെ അപേക്ഷിച്ച് ഇക്കുറി കാര്യമായ വിലവര്‍ധനയില്ലെന്നും കടയുടമകള്‍ പറയുന്നു. നിലമ്പൂരിന്റെ വിവിധ ഭാഗങ്ങളിലുള്ള കടകളിലേക്ക് പ്രധാനമായും പടക്കങ്ങള്‍ മൊത്തമായി വാങ്ങുന്നതും ഇവിടെനിന്നാണ്.
വിഷദിനം അടുത്തതോടെ വിപണിയില്‍ തിരക്കനുഭവപ്പെട്ടു തുടങ്ങിയതായും കടയുടമകള്‍ പറയുന്നു. പടക്കങ്ങള്‍ക്കു പുറമെ കുട്ടികള്‍ക്ക് പ്രിയങ്കരമായ കമ്പിത്തിരി, മത്താപ്പ്, മേശപ്പൂവ്, ചക്രം തുടങ്ങിയവയും വിപണി കീഴടക്കിക്കഴിഞ്ഞു.