ഫറോക്ക്: അപകടത്തില്‍പ്പെട്ട സ്‌കൂട്ടറില്‍ നിന്ന് കഞ്ചാവ് കണ്ടെടുത്ത കേസില്‍ ഒരാളെ പൊലിസ് അറസ്റ്റ് ചെയ്തു. കടലുണ്ടി കൊടുവായിക്കല്‍ വീട്ടില്‍ സുല്‍ഫിക്കര്‍ അലിയെയാണ് (30) ഫറോക്ക് പൊലിസ് പിടികൂടിയത്.
ഇയാളുടെ കൂടെയുണ്ടായിരുന്ന കടുക്ക ബസാര്‍ സ്വദേശി അഫ്‌സല്‍ കോഴിക്കോട് മെഡിക്കല്‍ കോളജില്‍ ചികിത്സയിലാണ്. സംഘത്തില്‍പ്പെട്ട ആനക്കുഴി ഷഹനാസിനായി പൊലിസ് തിരച്ചില്‍ ഊര്‍ജിതമാക്കി.
കഴിഞ്ഞ ദിവസം അര്‍ധരാത്രി മൂന്നുപേരും കഞ്ചാവുമായി സ്‌കൂട്ടറില്‍ പോകുന്നതിനിടെ കടലുണ്ടി റെയില്‍വേ ഒന്നാം പലത്തിനു സമീപം അപകടത്തില്‍പ്പെടുകയായിരുന്നു. അപകടം ശബ്ദം കേട്ട് പാലത്തിനു സമീപം പന്തുകളി കാണുകയായിരുന്ന പരിസരവാസികളാണ് ഗുരുതര പരുക്കേറ്റ സുല്‍ഫിക്കറിനെയും മറ്റൊരാളെയും കടലുണ്ടിയിലെ സ്വകാര്യ ആശുപത്രയില്‍ എത്തിച്ചത്.
അപകടത്തില്‍പ്പെട്ട മൂന്നാമത്തെ ആള്‍ സ്‌കൂട്ടര്‍ ആശുപത്രിയിലേക്കു കൊണ്ടുവരികയായിരുന്നു. ഇവിടെ വച്ചു നാട്ടൂകാര്‍ പരിശോധിച്ച്‌പ്പോഴാണ് സ്‌കൂട്ടറിന്റെ ഡിക്കിയില്‍ 40 പാക്കറ്റുകളിലായി സൂക്ഷിച്ച 460 ഗ്രാം കഞ്ചാവ് കണ്ടെടുത്ത്. ഇതോടെ അഫ്‌സലും ഷഹനാസും ഓടി രക്ഷപ്പെട്ടു. ഗുരുതര പരുക്കേറ്റ സുല്‍ഫിക്കറിനെയും സ്‌കൂട്ടറും നാട്ടുകാര്‍ പൊലിസില്‍ ഏല്‍പ്പിക്കുകയും ചെയ്തു. എന്നാല്‍ ഇയാളെ അറസ്റ്റ് ചെയ്യാതെ കേസെടുത്ത് പൊലിസ് വിട്ടയച്ചത് കടലുണ്ടിയില്‍ പ്രതിഷേധത്തിനിടയാക്കിയിരുന്നു. ഫറോക്ക് എസ്.ഐ എം.കെ അനില്‍കുമാറാണ് പ്രതിയെ അറസ്റ്റ് ചെയ്തത്.