കോഴിക്കോട്: മീഞ്ചന്ത ഗവ. ആര്‍ട്‌സ് കോളജിന് മുന്‍ മുഖ്യമന്ത്രി സി.എച്ച് മുഹമ്മദ് കോയയുടെ പേരില്‍ പഞ്ചനില കെട്ടിടം. കഴിഞ്ഞ യു.ഡി.എഫ് സര്‍ക്കാര്‍ അനുവദിച്ച മൂന്നുനില പി.ജി ബ്ലോക്കാണ് ഡോ. എം.കെ മുനീര്‍ എം.എല്‍.എയുടെ ശ്രമഫലമായി അഞ്ചു നിലയാക്കാന്‍ തീരുമാനിച്ചത്.
12 കോടിയില്‍ നിന്ന് തുക 18 കോടിയായും വര്‍ധിപ്പിച്ചു. 2019 ജൂണ്‍ 30ന് അകം കെട്ടിടം പ്രവൃത്തി പൂര്‍ത്തിയാക്കാനും വിദ്യാഭ്യാസ മന്ത്രി സി. രവീന്ദ്രനാഥിന്റെ അധ്യക്ഷയില്‍ ചേര്‍ന്ന യോഗം തീരുമാനിച്ചു. കിഫ്ബിയിലാണ് പദ്ധതിക്കുള്ള തുക വകയിരുത്തിയത്.
മീഞ്ചന്ത കോളജിന്റെ മാസ്റ്റര്‍ പ്ലാന് 100 കോടി രൂപയാണ് അനുവദിക്കുക. ഇക്കാര്യത്തില്‍ ജില്ലാ കലക്ടര്‍ ചെയര്‍മാനായ കോളജ് ഡവലെപ്‌മെന്റ് സമിതിയുടെയും പദ്ധതിക്കു മേല്‍നോട്ടം വഹിക്കുന്ന സിഡ്‌കോ ഉദ്യോഗസ്ഥരുടെയും യോഗം ഈ ആഴ്ച തന്നെ കോഴിക്കോട്ട് നടക്കുമെന്ന് ഡോ. എം.കെ മുനീര്‍ എം.എല്‍.എ അറിയിച്ചു.
തിരുവനന്തപുരത്ത് നടന്ന യോഗത്തില്‍ വിദ്യാഭ്യാസ മന്ത്രിക്ക് പുറമെ ഡോ. എം.കെ മുനീര്‍ എം.എല്‍.എ, വി.കെ.സി മമ്മദ്‌കോയ എം.എല്‍.എ, വിദ്യാഭ്യാസ സെക്രട്ടറി ഡോ. ഉഷ ടൈറ്റസ്, ചീഫ് എന്‍ജിനീയര്‍ ഹൈദ്രു, യു.എല്‍.സി.സി സെക്രട്ടറി ഷാജു സംബന്ധിച്ചു.