സാവോപോളോ: ബ്രസീലില്‍ സ്‌കൂളിലുണ്ടായ വെടിവയ്പില്‍ എട്ടുമരണം. ഒരു ജീവനക്കാരനും ഏഴുകൗമാരക്കാരുമാണ് മരിച്ചത്. സുസാനോയിലെ സര്‍ക്കാര്‍ സ്‌കൂളായ പ്രൊഫ. റൗള്‍ ബ്രസീല്‍ സ്‌കൂളിലാണ് സംഭവം. രാവിലെ സ്‌കൂള്‍ തുടങ്ങിയതിനു തൊട്ടുപിന്നാലെ അക്രമികള്‍ സ്‌കൂളിലെത്തി തലങ്ങുംവിലങ്ങും വെടിയുതിര്‍ക്കുകയായിരുന്നു. 11 പേര്‍ക്കു പരുക്കുണ്ട്. വെടിവയ്പിനു ശേഷം അക്രമികള്‍ സ്വയം വെടിവച്ചു മരിച്ചു. അജ്ഞാതരായ രണ്ടുകുട്ടികള്‍ തോക്കുമായി സ്‌കൂള്‍ കോംപൗണ്ടില്‍ പ്രവേശിച്ചതായും വെടിവയ്പ് തുടങ്ങിയതായും ബ്രസീലിയന്‍ മാധ്യമങ്ങള്‍ റിപ്പോര്‍ട്ട് ചെയ്തു.

മരണസംഖ്യ സംബന്ധിച്ച് അവ്യക്തതനിലനില്‍ക്കുന്നുണ്ട്. അമേരിക്കന്‍ സ്‌കൂളുകളില്‍ കുട്ടികള്‍ വെടിവയ്പ് നടത്തുന്നത് പതിവാണെങ്കിലും ലാറ്റിനമേരിക്കന്‍ രാജ്യങ്ങളില്‍ ഇത്തരത്തിലുള്ള സംഭവങ്ങള്‍ അസാധാരണമാണ്.