ഇടുക്കി: ഇടുക്കി അണക്കെട്ടിലെ ജനറേറ്ററുകള്‍ ഉടന്‍ നന്നാക്കില്ലെന്ന് വൈദ്യുതി മന്ത്രി എം.എം മണി. നിലവില്‍ ചൈനയില്‍ നിന്ന് വിദഗ്ധരെ എത്തിച്ച് പണി നടത്താനാകില്ലെന്നും മന്ത്രി വ്യക്തമാക്കി.

അതേ സമയം അണക്കെട്ടിലെ ജലനിരപ്പ് സംബന്ധിച്ച് ആശങ്കപ്പെടേണ്ടതില്ലെന്നും മന്ത്രി കൂട്ടിചേര്‍ത്തു.മൂന്ന് മാസം മുമ്പുണ്ടായ പൊട്ടിത്തെറിയാലാണ് അണക്കെട്ടിലെ രണ്ട് ജനറേറ്ററുകള്‍ തകരാറിലായത്. ഒരെണ്ണം വാര്‍ഷിക അറ്റകുറ്റപണിയിലാണ്. ഇപ്പോള്‍ മൂന്ന് ജനറേറ്ററുകളിലാണ് വൈദ്യുതോല്‍പാദനം നടത്തുന്നത്.

ഇതോടെ അണക്കെട്ടില്‍ മുന്‍വര്‍ഷത്തേക്കാളും 20 അടി ജലനിരപ്പ് കൂടിയിട്ടും പ്രയോജനമില്ലാത്ത സ്ഥിതിയായി.വൈദ്യുതി ഉല്‍പാദനം കുറഞ്ഞിരിക്കുന്ന സാഹചര്യത്തില്‍ മഴ കനത്താല്‍ ഡാം തുറക്കുകയല്ലാതെ കെഎസ്ഇബിക്ക് മുന്നില്‍ മറ്റ് വഴികളില്ല. 

ജലനിരപ്പ് ഉയര്‍ന്ന സാഹചര്യത്തില്‍ മുല്ലപ്പെരിയാര്‍ അണക്കെട്ട് സംബന്ധിച്ച കാര്യങ്ങള്‍ തമിഴ്‌നാടുമായി ചര്‍ച്ച ചെയ്യുമെന്നും മന്ത്രി വ്യക്തമാക്കി.