മെക്‌സികോ സിറ്റി: മെക്‌സികോയില്‍ കുടുംബത്തിലെ 11 പേര്‍ ഉള്‍പ്പെടെ 14 പേര്‍ വെടിയേറ്റു മരിച്ചു. രണ്ടിടങ്ങളിലാണ് വെടിവയ്പുണ്ടായത്. ഒരു സംഭവത്തില്‍ അഞ്ചുപെണ്‍കുട്ടികള്‍ ഉള്‍പ്പെടെ 11 പേരാണ് കൊല്ലപ്പെട്ടത്. ശനിയാഴ്ച വടക്കന്‍ മെക്‌സികോയിലാണ് ഈ സംഭവം. രണ്ടാമത്തെ ആക്രമണത്തില്‍ മറ്റൊരു കുടുംബത്തിലെ മൂന്നു പേരും കൊല്ലപ്പെട്ടു. കൊലപാതകം നടത്തിയ ഗ്രൂപ്പിനെ തിരിച്ചറിഞ്ഞിട്ടില്ലെന്നാണ് റിപ്പോര്‍ട്ടുകള്‍.

ലോപ്്‌സ് മാറ്റിയോസ് ജില്ലയില്‍ പ്രാദേശിക സമയം രാവിലെ ഏഴിനാണ് ആദ്യ ആക്രമണം. രണ്ടു പുരുഷന്മാരും നാലു സ്ത്രീകളും അഞ്ച് പെണ്‍കുട്ടികളും ഈ ആക്രമണത്തില്‍ കൊല്ലപ്പെട്ടു.
ഈ ആക്രമണം നടന്ന് 45 മിനുട്ടിന് ശേഷമാണ് റവല്യൂസിയന്‍ ജില്ലയില്‍ രണ്ടാമത്തെ ആക്രമണമുണ്ടായത്. ഇവിടെ ഒരു പുരുഷനും രണ്ടു സ്ത്രീകളും കൊല്ലപ്പെട്ടു.നാലു പേര്‍ക്ക് പരുക്കേറ്റിട്ടുണ്ട്. ആക്രമണം നടന്ന പ്രദേശങ്ങള്‍ പ്രശ്‌നബാധിത മേഖലകളാണ്. ഇവിടെ മയക്കുമരുന്ന് മാഫിയയുടെ കേന്ദ്രമാണെന്നും പൊലിസ് പറഞ്ഞു.