കാക്കനാട്: വാഹനങ്ങളില്‍ നിന്നും ബാറ്ററി മോഷ്ടിക്കുന്ന സംഘം പിടിയില്‍. ഓട്ടോ ഡ്രൈവര്‍മാരായ വല്ലാര്‍പാടം പണ്ടാരപ്പറമ്പില്‍ സുരാജ്(29), വൈപ്പിന്‍ ചക്യാമുറി സ്റ്റിബിന്‍ (28) എന്നിവരെയാണ് തൃക്കാക്കര പൊലിസ് അറസ്റ്റ് ചെയ്തത്. കാക്കനാട് ഓലിമുകള്‍ ജങ്ഷനില്‍ പൊലിസ് നടത്തിയ രാത്രി കാല പരിശോധനക്കിടയിലാണ് പ്രതികള്‍ പിടിയിലായത്. ഇവര്‍ സഞ്ചരിച്ച ഓട്ടോയില്‍ ബാറ്ററികള്‍ കണ്ട് സംശയം തോന്നിയ പൊലിസ് ചോദ്യം ചെയ്യലില്‍ സീപോര്‍ട്ട് എയര്‍പോര്‍ട്ട് റോഡില്‍ സണ്‍റൈസ് ഹോസ്പ്പിറ്റലിനു സമീപം നിര്‍ത്തിയിട്ടിരുന്ന ലോറിയില്‍ നിന്നും മോഷ്ടിച്ചതാണെന്ന് കണ്ടെത്തുകയായിരുന്നു.
സിവില്‍ സ്റ്റേഷനടക്കം വിവിധ സ്ഥലങ്ങളില്‍ പാര്‍ക്ക് ചെയ്തിരുന്ന വാഹനങ്ങളില്‍ നിന്നും ബാറ്ററി മോഷണങ്ങള്‍ സംബന്ധിച്ച് പരാതികള്‍ ഉള്ളതിനാല്‍ പ്രതികളെ കൂടുതല്‍ ചോദ്യം ചെയ്യുന്നതിന് കസ്റ്റഡിയില്‍ ആവശ്യപ്പെടുമെന്ന് തൃക്കാക്കര പൊലീസ് അറിയിച്ചു.
പകല്‍ ഓട്ടോ ഓടിക്കുകയും രാത്രികളില്‍ സുരാജിന്റെ ഓട്ടോയില്‍ കറങ്ങി നടന്ന് ബാറ്ററി മോഷണം നടത്തുകയാണ് ഇവരുടെ പതിവെന്നും പൊലിസ് പറഞ്ഞു. തൃക്കാക്കര എസ്.ഐമാരായ കെ.എ റഷീദ്, പ്രേംകുമാര്‍ എന്നിവരുടെ നേതൃത്വത്തിലാണ് പരിശോധന നടത്തിയത്.
എ.എസ്.ഐമാരായ ബാബു, റോയ് കെ.പുന്നൂസ് സി.പി.ഒമാരായ ശ്രീകുമാര്‍, അജികുമാര്‍, ബെന്നി തുടങ്ങിയവര്‍ അന്വേഷണ സംഘത്തിലുണ്ടായിരുന്നു. പ്രതികളെ കോടതിയില്‍ ഹാജരാക്കി റിമാന്റ് ചെയ്തു.