കണ്ണൂര്‍: നോട്ട് ക്ഷാമം കാരണം എ.ടി.എമ്മുകള്‍ കാലിയായതോടെ ആവശ്യത്തിന് പണം കിട്ടാതെ ജനങ്ങള്‍ വലയുന്നു. വിഷു, ഈസ്റ്റര്‍ ആഘോഷങ്ങളും അവധിക്കാലവും ആയതോടെ പണം      പിന്‍വലിക്കുന്നതിന് എ.ടി.എമ്മുകളെ ആശ്രയിക്കാമെന്നു കരുതിയവരാണ് കൂടുതല്‍ ദുരിതത്തിലായത്. നോട്ട് നിരോധനത്തിനു ശേഷം ആവശ്യമായ നോട്ടുകളെത്തിക്കാത്തതാണ് ക്ഷാമത്തിന് കാരണം. ശമ്പളവും പെന്‍ഷനും ബാങ്കുകളില്‍ പിന്‍വലിക്കാന്‍ എത്തിയവരും പണം കിട്ടാതെ വിഷമത്തിലാണ്. ജില്ലയിലെ ഒട്ടുമിക്ക എ.ടി.എമ്മുകളും ഇന്നലെയും കാലിയായിരുന്നു.
പണമുള്ള എ.ടി.എമ്മുകള്‍ക്ക് മുന്നില്‍ നീണ്ട ക്യൂവുമുണ്ടായി. ഇന്നും നാളെയും ബാങ്ക് അവധിയായതിനാല്‍ ശനിയാഴ്ച്ച മാത്രമേ ഇനി എ.ടി.എമ്മുകള്‍ നിറയ്ക്കാനാവുകയുള്ളു. ട്രഷറികളില്‍ ആവശ്യത്തിന് പണം ഇല്ലാതിരുന്നതിനാല്‍ ശമ്പളവും പെന്‍ഷന്‍ വിതരണവും കഴിഞ്ഞ ദിവസങ്ങളില്‍ അവതാളത്തിലായിരുന്നു. ഡെബിറ്റ് കാര്‍ഡ്, ക്രെഡിറ്റ് കാര്‍ഡ് എന്നിവ ഉപയോഗിക്കുമ്പോള്‍ സര്‍വിസ് ചാര്‍ജ് ഇനത്തില്‍ നല്ല തുകയാണ് ബാങ്കുകള്‍ ഇടപാടുകാരില്‍ നിന്നു ഈടാക്കുന്നത്.
അമിതമായ സര്‍വിസ് ചാര്‍ജ് കാരണം എല്ലാവരും ഒറ്റതവണ പരമാവധി തുക പിന്‍വലിക്കുന്നതും ഓണ്‍ലൈന്‍ ബാങ്കിങ് സംവിധാനം ഉപയോഗിക്കാനാവാത്തതുമാണ് നോട്ട് ക്ഷാമത്തിനു മറ്റൊരു കാരണം. സ്റ്റേറ്റ് ബാങ്കുകളുടെ ലയനത്തിനു ശേഷം ഓരോ ഇടപാടിനും വലിയ തുക സര്‍വിസ് ചാര്‍ജും വലിയ പിഴയുമാണ് ബാങ്ക് പ്രഖ്യാപിച്ചത്.
ഇതിനു പുറമെ എല്ലാ പണമിടപാടുകള്‍ക്കും എ.ടി.എം ഉപയോഗത്തിനും നിയന്ത്രണങ്ങളും പിഴയും ഏര്‍പ്പെടുത്തിയും ബാങ്കുകള്‍ ഉപഭോക്താക്കളെ ചൂഷണം ചെയ്യുകയാണ്.