ടെല്‍ അവീവ്: ഫലസ്തീന് കൈമാറാനുള്ള കൊവിഡ് പ്രതിരോധ സാമഗ്രികളും മരുന്നുകളും വഹിച്ചുള്ള യു.എ.ഇ വിമാനം ഇസ്‌റാഈലിലെത്തി. ഇത്തിഹാദ് എയര്‍വേയ്‌സിന്റെ വിമാനമാണ് കഴിഞ്ഞ ദിവസം ബെന്‍ ഗുരിയോന്‍ വിമാനത്താവളത്തില്‍ ഇറങ്ങിയത്. അബൂദബിയില്‍നിന്ന് ഇറാഖ്, തുര്‍ക്കി വഴി ടെല്‍അവീവിലെത്തിയ വിമാനത്തില്‍ ഏതു രാജ്യത്തിന്റേതാണെന്ന് തിരിച്ചറിയാനുള്ള ചിഹ്നങ്ങള്‍ പതിച്ചിരുന്നില്ല. വിമാനത്തിന് വെളുത്ത പെയിന്റാണ് അടിച്ചിരുന്നത്. യു.എ.ഇയും ഇസ്‌റാഈലും തമ്മില്‍ നിലവില്‍ നയതന്ത്ര ബന്ധമില്ല. പുതിയ ബന്ധത്തിന് ഇതു കാരണമാകുമെന്ന ഇസ്‌റാഈല്‍ അധികൃതരുടെ പ്രസ്താവനയോട് യു.എ.ഇ പ്രതികരിച്ചിട്ടുമില്ല.