നീലേശ്വരം: താറാവ് അടയിരിക്കുമെന്ന് ആരെങ്കിലും പറഞ്ഞാല്‍ നാം അവരെ കളിയാക്കും. കാരണം താറാവുകള്‍ അടയിരിക്കുന്ന പതിവില്ല. അതാണ് പ്രകൃതി നിയമം. എന്നാല്‍ ഇതിന് അപവാദമാണ് നീലേശ്വരത്ത് ഒരു താറാവ്. സാധാരണ കോഴിക്ക് അടവച്ചോ, ഇന്‍ക്യുബേറ്റര്‍ വഴിയോ ആണ് താറാവിന്റെ മുട്ട വിരിയിക്കാറ്.
എന്നാല്‍ നീലേശ്വരത്തെ ഹോട്ടലായ പരിപ്പുവട വിഭവശാലയിലെ ജീവനക്കാര്‍ ക്വാര്‍ട്ടേഴ്‌സിനു സമീപം വളര്‍ത്തുന്ന താറാവാണ് അടയിരുന്ന് മാതൃത്വത്തിന്റെ ഉദാത്ത മാതൃകയാകുന്നത്. ആറു മുട്ടകളാണുള്ളത്. ശരീരത്തിന്റെ ചൂട് മുഴുവനായും മുട്ടകള്‍ക്കേല്‍ക്കാനായി കഴുത്തിനു താഴെ മുതല്‍ വയറുവരെയുള്ള ഭാഗത്തെ തൂവലുകള്‍ മുഴുവന്‍ കൊത്തിപ്പറിച്ചു കളഞ്ഞു. ആരേയും അടുത്തേക്കു പോകാനും സമ്മതിക്കുന്നില്ല. നാട്ടുകാര്‍ക്ക് കൗതുക കാഴ്ചയാവുകയാണ് അടയിരിക്കുന്ന ഈ താറാവ്.