കൊല്ലം: രണ്ടാം വാര്‍ഷികം ആഘോഷിക്കുന്ന എല്‍.ഡി.എഫ് സര്‍ക്കാര്‍ പ്രകടന പത്രികയില്‍ വാഗ്ദാനം ചെയ്ത അറബിക് സര്‍വ്വകലാശാല സ്ഥാപിക്കുന്ന കാര്യത്തില്‍ തുടര്‍ന്ന് വരുന്ന അനാസ്ഥ പ്രതിഷേധാര്‍ഹമാണെന്നും ഒട്ടും വൈകാതെ ഇത് യാഥാര്‍ഥ്യമാക്കണമെന്നും കൊല്ലത്ത് ചേര്‍ന്ന കേരള മുസ്‌ലിം ജമാഅത്ത് ഫെഡറേഷന്‍ സംസ്ഥാന കമ്മിറ്റിയുടെയും ജില്ലാ താലൂക്ക് ഭാരവാഹികളുടെയും സംയുക്ത യോഗം സര്‍ക്കാരിനോട് ആവശ്യപ്പെട്ടു. ന്യൂനപക്ഷ വിഭാഗങ്ങളുടെ ഭരണഘടനപരമായ അവകാശങ്ങള്‍ അട്ടിമറിക്കുന്ന സമീപനം ഉപേക്ഷിക്കണമെന്നും യോഗം ആവശ്യപ്പെട്ടു.
വിവാഹം, വിവാഹ മോചനം തുടങ്ങിയ വിഷയങ്ങളില്‍ നാട്ടില്‍ നടമാടിക്കൊണ്ടിരിക്കുന്ന സംഭവങ്ങള്‍ അവസാനിപ്പിക്കുന്നതിനും അതുമൂലമുണ്ടാകുന്ന പ്രത്യാഖാതങ്ങളില്‍ നിന്നും ഒഴിവാക്കുന്നതിനും വേണ്ടി സംസ്ഥാന ജില്ലാ താലൂക്ക് അടിസ്ഥാനത്തില്‍ അദാലത്തുകള്‍ സംഘടിപ്പിക്കുവാനും, അതിനു വേണ്ടി പണ്ഡിതന്മാര്‍, നിയമജ്ഞന്മാരും നേതാക്കളും അടങ്ങുന്ന സമിതികള്‍ക്ക് രൂപം നല്‍കുവാനും തീരുമാനിച്ചു.
സംസ്ഥാനടിസ്ഥാനത്തില്‍ 13 അംഗങ്ങള്‍ അടങ്ങുന്ന ഒരു ശരീഅത്ത് ബോര്‍ഡിനേയും യോഗം തെരഞ്ഞെടുത്തു. സമുദായ അംഗങ്ങളുടെ ഇടയിലുള്ള അഭിപ്രായ വ്യത്യാസങ്ങളും അസ്വസ്ഥകളും ഇല്ലാതാക്കാന്‍ ഈ കൗണ്‍സിലുകള്‍ ഉപയോഗപ്പെടുത്താന്‍ യോഗം തീരുമാനിച്ചു.
സമൂഹത്തിലെ ദാരിദ്രാവസ്ഥക്ക് വിരാമം കുറിക്കാന്‍ സക്കാത്ത് വിതരണം മഹല്ല് അടിസ്ഥാനത്തില്‍ ശരിഅത്ത് നിയമം അനുസരിച്ച് സംഘടിപ്പിച്ച് നടത്തുവാനും യോഗം തീരുമാനിച്ചു. യോഗത്തില്‍ സംസ്ഥാന പ്രസിഡന്റ് കടയ്ക്കല്‍ അബ്ദുല്‍ അസീസ് മൗലവി അധ്യക്ഷനായി. തൊടിയൂര്‍ മുഹമ്മദ് കുഞ്ഞ് മൗലവി യോഗം ഉദ്ഘാടനം ചെയ്തു. ജനറല്‍ സെക്രട്ടറി കെ.പി മുഹമ്മദ് റിപ്പോര്‍ട്ട് അവതരിപ്പിച്ചു. വൈസ് പ്രസിഡന്റ് എം.എ സമദ്, എ.കെ ഉമര്‍ മൗലവി, കരമന മാഹീന്‍, മേക്കോണ്‍ അബ്ദുല്‍ അസീസ്, പുനലൂര്‍ അബ്ദുല്‍ റഷീദ്, കെ.എ റഷീദ് പുനലൂര്‍, പ്രൊഫ. വൈ. മുഹമ്മദ് കുഞ്ഞ്, കെ.എച്ച് മുഹമ്മദ് മൗലവി, പുല്ലംമ്പാറ താജുദ്ദീന്‍, കായംകുളം കെ.കെ ജലാലുദ്ദീന്‍ മൗലവി, നിലമേല്‍ അഷറഫ് ബദരി, എം. ഇമാമുദ്ദീന്‍ മാസ്റ്റര്‍, പനച്ചമൂട് ലിയാക്കത്തലിഖാന്‍, റഷീദാലി അടുര്‍, തലച്ചിറ ഷാജഹാന്‍ മൗലവി, കണ്ണനെല്ലൂര്‍ നിസാമുദ്ദീന്‍, എച്ച്.എ വഹാബ്, അബ്ദുല്‍ സലാം സാര്‍ പനവൂര്‍, ടി.ഐ നൗഷാദ്, സാദിഖലിഖാന്‍ സംസാരിച്ചു.