കുമ്പള: ജില്ലയിലെ ഭൂരിഭാഗം റെയില്‍വേ അടിപ്പാതകകളും ജലാശയങ്ങളായി മാറുമ്പോള്‍ കുമ്പളയില്‍ നിര്‍മാണം ആരംഭിച്ചപ്പോള്‍ തന്നെ കുളത്തിനു സമാനം.
ഒന്നര മാസം മുന്‍പാണ് ഇവിടെ അടിപ്പാത നിര്‍മാണ പ്രവൃത്തി തുടങ്ങിയത്. കാലവര്‍ഷത്തിന് ദിവസങ്ങള്‍ക്ക് മുന്‍പാണ് കുഴിയെടുക്കല്‍ പ്രവൃത്തി പൂര്‍ത്തീകരിച്ചത്. ഇപ്പോള്‍ ഇവിടം വെള്ളം കയറി കുളത്തിന് സമാനമായ അവസ്ഥയിലാണ്.
കഴുത്തോളം വെള്ളത്തില്‍നിന്നാണ് തൊഴിലാളികള്‍ ഇപ്പോള്‍ കമ്പി കെട്ടുന്ന ജോലികള്‍ ചെയ്തുവരുന്നത്. കുഴിയില്‍ രണ്ട് വലിയ മോട്ടോറുകള്‍ വെച്ച് വെള്ളം പുറത്തേക്കു പമ്പ് ചെയ്യുന്നുണ്ടെങ്കിലും പൂര്‍ണമായും വറ്റിക്കാനാവുന്നില്ല. വെള്ളം പുറത്തു വിടാന്‍ ചാലുകീറിയിട്ടുണ്ടെങ്കിലും പ്രയോജനമുണ്ടായിട്ടില്ല. രണ്ടാള്‍ പൊക്കത്തില്‍ വെള്ളമുള്ളതിനാല്‍ തൊഴിലാളികള്‍ വളരെ ഭീതിയോടെയാണ് ജോലി ചെയ്യുന്നത്.
അതേസമയം നിര്‍മാണത്തില്‍ അപാകതയുള്ളതായ നാട്ടുകാര്‍ പറയുന്നു. ഇപ്പോള്‍ ഈ അവസ്ഥയാണെങ്കില്‍ പ്രവൃത്തി പൂര്‍ത്തീകരിച്ചിട്ട് എന്ത് പ്രയോജനമെന്നും നാട്ടുകാര്‍ ചോദിക്കുന്നു.