കല്‍പ്പറ്റ: ലോക്‌സഭാ തെരഞ്ഞെടുപ്പില്‍ കേരളത്തില്‍ മത്സരിപ്പിക്കുന്നതിന് കോണ്‍ഗ്രസ് ദേശീയ-സംസ്ഥാന നേതൃത്വത്തിന്റെ സജീവ പരിഗണനയിലുള്ളവരുടെ പട്ടികയില്‍ കെ.സി റോസക്കുട്ടിയും. കോണ്‍ഗ്രസിലെ വമ്പന്മാര്‍ കണ്ണുവച്ച വയനാട് മണ്ഡലത്തിനു പുറമെ ഇടുക്കി മണ്ഡലത്തിലേക്കുള്ള പട്ടികയിലും അവസാനവട്ടത്തില്‍ റോസക്കുട്ടി ഉള്‍പെട്ടതായാണ് വിവരം.
സുല്‍ത്താന്‍ ബത്തേരിയില്‍ സ്ഥിരതാമസമാക്കിയ മുള്ളന്‍കൊല്ലി സ്വദേശിയായ റോസക്കുട്ടി എ.ഐ.സി.സി മെംബറും സുല്‍ത്താന്‍ ബത്തേരി മുന്‍ എം.എല്‍.എയും സംസ്ഥാന വനിതാ കമ്മിഷന്‍ മുന്‍ അധ്യക്ഷയുമാണ്. കോണ്‍ഗ്രസിലെ എ വിഭാഗക്കാരിയാണ്. ദേശീയ നേതാക്കളായ എ.കെ ആന്റണി, ഷീല ദീക്ഷിത്, ഉമ്മന്‍ചാണ്ടി എന്നിവരുമായി അടുത്ത സൗഹൃദം പുലര്‍ത്തുന്നയാള്‍ കൂടിയാണ് റോസക്കുട്ടി.
ഗ്രൂപ്പ് തടസമാകുന്നില്ലെങ്കില്‍ വയനാട് മണ്ഡലത്തില്‍ മുന്തിയ പരിഗണന റോസക്കുട്ടിക്കു ലഭിക്കുമെന്നു കരുതുന്ന കോണ്‍ഗ്രസ് നേതാക്കള്‍ ജില്ലയിലും പുറത്തുമുണ്ട്. ലോക്‌സഭാ തെരഞ്ഞെടുപ്പിന്റെ പശ്ചാത്തലത്തില്‍ കേരളത്തിന്റെ ചുമതലയുള്ള എ.ഐ.സി.സി ജനറല്‍ സെക്രട്ടറി മുകുള്‍വാസ്‌നികിന്റെ സാന്നിധ്യത്തില്‍ കല്‍പ്പറ്റയില്‍ നടന്ന ജില്ലാ കോണ്‍ഗ്രസ് നേതൃസംഗമത്തില്‍ വയനാട് മണ്ഡലം സ്ഥാനാര്‍ഥിയായി പരിഗണിക്കുന്നതിന് റോസക്കുട്ടിയുടെ പേര് എ ഗ്രൂപ്പില്‍നിന്നുള്ള എ.ഐ.സി.സി മെംബര്‍ പി.കെ ജയലക്ഷ്മി, കെ.പി.സി.സി മെംബര്‍ എന്‍.ഡി അപ്പച്ചന്‍ അടക്കമുള്ള നേതാക്കള്‍ നിര്‍ദേശിച്ചിരുന്നു. മണ്ഡലം പരിധിയിലുള്ള നേതാവിനു പരിഗണന നല്‍കണമെന്ന ആവശ്യവും അന്നുയര്‍ന്നിരുന്നു. വടക്കേ വയനാട്ടില്‍നിന്നുള്ള ഐ വിഭാഗക്കാരായ ചില നേതാക്കള്‍ അന്ന് ഷാനിമോള്‍ ഉസ്മാന്റെ പേരും നിര്‍ദേശിച്ചു. ഇത് അടുത്ത ദിവസം വാര്‍ത്തയായെങ്കിലും പിന്നീട് മണ്ഡലത്തിലെ കോണ്‍ഗ്രസ് സ്ഥാനാര്‍ഥിത്വം സംബന്ധിച്ച മാധ്യമ റിപ്പോര്‍ട്ടുകളില്‍ പലതിലും റോസക്കുട്ടിയുടെ പേര് ഇടംപിടിച്ചിരുന്നില്ല.
ഇങ്ങനെയിരിക്കെയാണ് റോസക്കുട്ടി പാര്‍ട്ടി നേതൃത്വത്തിന്റെ സജീവ പരിഗണനയിലായത്. കഴിഞ്ഞ ദിവസം ഡല്‍ഹിയില്‍ പാര്‍ട്ടിയിലെ മുതിര്‍ന്ന നേതാക്കളില്‍ ചിലരെ നേരില്‍ക്കണ്ട അവര്‍ ടിക്കറ്റ് അഭ്യര്‍ഥിച്ചിട്ടുമുണ്ട്. തെരഞ്ഞെടുപ്പില്‍ മത്സരിക്കുന്നില്ലെന്ന കെ.സി വേണുഗോപാലിന്റെ നിലപാട് ആലപ്പുഴയില്‍ ഷാനിമോള്‍ ഉസ്മാന്റെ വഴി സുഗമമാക്കിയിരുന്നു. എന്നാല്‍ ആലപ്പുഴ വേണ്ട, വയനാട് മതിയെന്ന നിലപാടിലാണ് ഷാനിമോള്‍. ഇതിനോടു നേതൃത്വം എങ്ങനെ പ്രതികരിക്കുമെന്നതിനെ ആശ്രയിച്ചാണ് റോസക്കുട്ടി ഉള്‍പ്പെടെ വയനാട്ടില്‍ സ്ഥാനാര്‍ഥിത്വം മോഹിക്കുന്ന മറ്റുള്ളവരുടെ സാധ്യത.
ഇടുക്കി സീറ്റിലും പരിഗണനയിലുണ്ടെങ്കിലും വയനാട്ടിലാണ് റോസക്കുട്ടിക്കും താല്‍പര്യം. വിജയം സുനിശ്ചിതമെന്നു കോണ്‍ഗ്രസ് നേതൃത്വം വിലയിരുത്തുന്ന മണ്ഡലങ്ങളിലൊന്നാണ് വയനാട്. ഇതുതന്നെയാണ് നേതാക്കളെ വയനാട് ഇത്രകണ്ട് ഇഷ്ടത്തിലാക്കുന്നത്.