ചെറുവത്തൂര്‍: അത്യാവശ്യമായി തിരുവനന്തപുരത്തേക്ക് പോകേണ്ടി വന്നതിനാലാണ് പയ്യന്നൂര്‍ മുനിസിപ്പാലിറ്റിയില്‍ ഐ.കെ.എം വിഭാഗത്തില്‍ ജീവനക്കാരനായ ഭാഗ്യനാഥ് അന്ത്യോദയ എക്‌സ്പ്രസിനെ ആശ്രയിച്ചത്. കാസര്‍കോട് ജില്ലയില്‍ സ്റ്റോപ്പില്ലാത്തതിനാല്‍ കണ്ണൂരിലെ ട്രെയിന്‍ കയറി. ആറ് കംപാര്‍ട്ടുമെന്റുകളിലായി ഉള്ളത് ഒരു യാത്രക്കാരന്‍ മാത്രം.
അത്യാധുനിക സംവിധാനങ്ങളോടെ എത്തിയ ട്രെയിന്‍ വിരലിലെണ്ണാവുന്ന യാത്രക്കാരുമായി കുതിച്ചു പായുന്നതിന്റെ നേര്‍ചിത്രം കാസര്‍കോട് പിലിക്കോട് സ്വദേശിയായ ഭാഗ്യനാഥ് തന്നെ പറയുന്നു: 'സാധാരണക്കാര്‍ക്ക് വേണ്ടിയെന്നു പറഞ്ഞ് ആരംഭിച്ച ട്രെയിനിന് എന്റെ നാട്ടില്‍ സ്റ്റോപ്പില്ലാത്തതിനാല്‍ മലബാര്‍ എക്‌സ് പ്രസില്‍ തിക്കിത്തിരക്കിനിന്ന് കണ്ണൂരെത്തിയാണ് അന്ത്യോദയയില്‍ കയറിയത്. കൊച്ചുവേളിയിലേക്ക് കണ്ണൂരില്‍നിന്ന് 185 രൂപയാണ് യാത്രാ ചാര്‍ജ്. ഭംഗിയുള്ള കോച്ചുകള്‍, നല്ല ടോയ്‌ലറ്റ്, നല്ല സീറ്റുകള്‍, നല്ല വെളിച്ചം. മറ്റുവണ്ടികളില്‍ റിസര്‍വേഷന്‍ കോച്ചിലുള്ളതിനേക്കാളും സൗകര്യം. പക്ഷേ; യാത്രക്കാര്‍ മാത്രമില്ല. ഒരു കോച്ചില്‍നിന്ന് അടുത്തതിലേക്ക് പോകുവാന്‍ സൗകര്യമുള്ളതിനാല്‍ കുറെ മുന്നോട്ട് നടന്നു. ആറ് കോച്ചുകള്‍ കഴിഞ്ഞിട്ടും ഒരു മനുഷ്യനെയും കാണാനില്ല. കോഴിക്കോട്ടെത്തിയപ്പോള്‍ ഏകദേശം 30 പേര്‍ കയറിക്കാണും. ഈ 30 പേര്‍,17 ജനറല്‍ കംപാര്‍ട്ടുമെന്റുകളില്‍ അങ്ങിങ്ങായി കയറി. കൊച്ചുവേളിയില്‍ വണ്ടിയെത്തിയപ്പോള്‍ അവസാന സ്റ്റോപ്പില്‍ ഇറങ്ങാന്‍ ഉണ്ടായിരുന്നത് വെറും 25 പേരോളം'.
മാവേലി, മലബാര്‍ എക്‌സ്പ്രസുകളില്‍ ജനറല്‍ കംപാര്‍ട്ട്‌മെന്റില്‍ ടോയ് ലറ്റില്‍ നിന്നുപോലും ജനങ്ങള്‍ യാത്രചെയ്യുമ്പോഴാണ് കാസര്‍കോട് ഒരിടത്തും സ്റ്റോപ്പില്ലാതെ അന്ത്യോദയ ഓടുന്നത്. ആദര്‍ശ് സ്റ്റേഷനായ കാസര്‍കോട് രണ്ടു മിനിട്ടെങ്കിലും ട്രെയിനിനു സ്റ്റോപ്പ് അനുവദിക്കണം എന്നതാണ് ആവശ്യം.അതേസമയം അന്ത്യോദയ എക്‌സ്പ്രസിനു കാസര്‍കോട് സ്റ്റോപ്പ് അനുവദിക്കണമെന്നു ആവശ്യപ്പെട്ടു ശക്തമായ പ്രതിഷേധങ്ങളാണ് ഉയരുന്നത്.