കൊല്‍ക്കത്ത: ലോക്‌സഭാ തെരഞ്ഞെടുപ്പില്‍ സീറ്റ് നിഷേധിക്കപ്പെട്ടതിനെത്തുടര്‍ന്ന് തൃണമൂല്‍ കോണ്‍ഗ്രസ് എം.എല്‍.എ അര്‍ജുന്‍ സിങ് പാര്‍ട്ടി വിട്ട് ബി.ജെ.പിയില്‍ ചേര്‍ന്നു. ഡല്‍ഹിയില്‍ മുതിര്‍ന്ന ബി.ജെ.പി നേതാക്കളായ കൈലാശ് വിജയവാര്‍ഗിയ ഉള്‍പെടെയുള്ള നേതാക്കളുടെ സാന്നിധ്യത്തിലാണ് അര്‍ജുന്‍ സിങ് പാര്‍ട്ടി അംഗത്വം എടുത്തത്. 40 വര്‍ഷം മമതാ ബാനര്‍ജിക്കു കീഴില്‍ പ്രവര്‍ത്തിച്ചുവെന്നും പക്ഷെ ബാലാകോട്ട് ആക്രമണത്തിനു ശേഷം മമതാ ബാനര്‍ജി സൈന്യത്തിന്റെ വിശ്വാസ്യതയെ ചോദ്യം ചെയ്തത് തന്നെ വേദനിപ്പിച്ചുവെന്നും അര്‍ജുന്‍ സിങ് മാധ്യമങ്ങളോട് പറഞ്ഞു. രാജ്യമൊന്നാകെ പാകിസ്താനെതിരെ സംസാരിച്ചപ്പോള്‍ മമത കേന്ദ്രസര്‍ക്കാരിന്റെ ഉദ്ദേശശുദ്ധിയെ ചോദ്യം ചെയ്യുകയാണുണ്ടായതെന്നും അദ്ദേഹം പറഞ്ഞു.
നേരത്തെ ബാരക്പൂര്‍ മണ്ഡലത്തില്‍ സീറ്റ് വേണമെന്ന് മമതയോട് അദ്ദേഹം ആവശ്യപ്പെട്ടിരുന്നെങ്കിലും ലഭിച്ചിരുന്നില്ല. സിറ്റിങ് എം.പി ദിനേഷ് ത്രിവേദിക്കു വീണ്ടും സീറ്റ് നല്‍കിയതോടെ പാര്‍ട്ടിയുമായി ഇടഞ്ഞ അദ്ദേഹം പിന്നീട് തൃണമൂല്‍ വിടാന്‍ തീരുമാനിക്കുകയായിരുന്നു. നേരത്തെ തൃണമൂല്‍ വിട്ട് ബി.ജെ.പിയിലെത്തിയ മുന്‍ കേന്ദ്രമന്ത്രി മുകുള്‍ റോയിയുമായി ഡല്‍ഹിയില്‍ നടത്തിയ മാരത്തോണ്‍ ചര്‍ച്ചയ്ക്കു ശേഷമാണ് അദ്ദേഹം പാര്‍ട്ടി വിടാന്‍ തീരുമാനിച്ചത്. പാര്‍ട്ടി വിടേണ്ടവര്‍ക്ക് പോകാമെന്നും തനിക്കു യാതൊരു പ്രശ്‌നമില്ലെന്നും ബുധനാഴ്ച സ്ഥാനാര്‍ഥിപ്പട്ടിക പുറത്തുവിട്ട് മമതാ ബാനര്‍ജി പറഞ്ഞിരുന്നു.