തിരുവനന്തപുരം: തുടക്കത്തില്‍ തന്നെ തെരഞ്ഞെടുപ്പു മാതൃകാ പെരുമാറ്റച്ചട്ടം ലംഘിച്ച് ബി.ജെ.പിയും സംഘ്പരിവാര്‍ സംഘടനകളും. മതവികാരവും സ്പര്‍ധയും വളര്‍ത്തുംവിധമുള്ള ലഘുലേഖകള്‍ വ്യാപകമായി ഈ സംഘടനകള്‍ വിതരണം ചെയ്യുന്നതിനെതിരേ എല്‍.ഡി.എഫ് തിരുവനന്തപുരം ലോക്‌സഭാമണ്ഡലം തെരഞ്ഞെടുപ്പുകമ്മിറ്റി തെരഞ്ഞെടുപ്പു കമ്മിഷന് പരാതി നല്‍കി.
തിരുവനന്തപുരത്ത് ശബരിമല അയ്യപ്പന്റെ ചിത്രം ഉള്‍പെടുത്തിയുള്ള ലഘുലേഖയാണ് ബി.ജെ.പി പ്രവര്‍ത്തകര്‍ വീടുകളില്‍ വിതരണം ചെയ്യുന്നത്. മതസ്ഥാപനങ്ങള്‍, ആരാധനാലയങ്ങള്‍, ജാതി, മതം, ഇവയുടെ വിശ്വാസങ്ങള്‍ തുടങ്ങിയവ ഉപയോഗപ്പെടുത്തി പ്രചാരണം നടത്തരുതെന്ന കേന്ദ്ര തെരഞ്ഞെടുപ്പു കമ്മിഷന്റെ നിര്‍ദേശവും ചട്ടങ്ങളുടെയും ലംഘനമാണിത്. ശബരിമല കര്‍മസമിതിയുടെ പേരിലാണ് ലഘുലേഖ.
ഇതിനെതിരേ നടപടി സ്വീകരിക്കണമെന്നാവശ്യപ്പെട്ട് എല്‍.ഡി.എഫ് തിരുവനന്തപുരം ലോക്‌സഭാ മണ്ഡലം തെരഞ്ഞെടുപ്പുകമ്മിറ്റി തെരഞ്ഞെടുപ്പു കമ്മിഷനും മുഖ്യ തെരഞ്ഞെടുപ്പ് ഓഫിസര്‍ക്കും ജില്ലാ കലക്ടര്‍ക്കും പരാതി നല്‍കി.
മതചിഹ്നങ്ങളോ ദൈവചിത്രങ്ങളോ ഉപയോഗിച്ച് പ്രചാരണം നടത്തരുതെന്നാണ് തെരഞ്ഞെടുപ്പു കമ്മിഷന്റെ ചട്ടം. അയ്യപ്പന്റെ ചിത്രത്തോടു കൂടിയുള്ള ലഘുലേഖയ്‌ക്കൊപ്പം നരേന്ദ്രമോദിയുടെ ചിത്രത്തോടുകൂടിയ ലഘുലേഖയും വിതരണം ചെയ്യുന്നുണ്ട്. ശബരിമല യുവതീപ്രവേശനം സംബന്ധിച്ച സുപ്രിംകോടതി വിധി വക്രീകരിച്ചാണ് ലഘുലേഖയില്‍ അവതരിപ്പിച്ചിരിക്കുന്നത്. ഇതും ചട്ടലംഘനമാണെന്ന് എല്‍.ഡി.എഫ് തെരഞ്ഞെടുപ്പു കമ്മിറ്റി ചെയര്‍മാന്‍ എം. വിജയകുമാര്‍ വാര്‍ത്താസമ്മേളനത്തില്‍ പറഞ്ഞു. ജി.ആര്‍ അനില്‍, ആനാവൂര്‍ നാഗപ്പന്‍ എന്നിവരും വാര്‍ത്താസമ്മേളനത്തില്‍ പങ്കെടുത്തു.