മുംബൈ: ലോക്‌സഭാ തെരഞ്ഞെടുപ്പിനുള്ള ആദ്യഘട്ട സ്ഥാനാര്‍ഥിപ്പട്ടിക എന്‍.സി.പി പുറത്തിറക്കി. പാര്‍ട്ടി അധ്യക്ഷന്‍ ശരത് പവാറിന്റെ മകള്‍ സുപ്രിയാ സുലെയും ലക്ഷദ്വീപിലെ സിറ്റിങ് എം.പി മുഹമ്മദ് ഫൈസലും ഉള്‍പെടെ 12 പേരുടെ പട്ടികയാണ് ഇന്നലെ പുറത്തിറക്കിയത്.
ബാരാമതി മണ്ഡലത്തില്‍ നിന്നാണ് സുപ്രിയ ജനവിധി തേടുക. സഞ്ജയ് ദിന പാട്ടീല്‍ (മുംബൈ നോര്‍ത്ത് ഈസ്റ്റ്), ആനന്ദ് പരഞ്ച്‌പെ (താനെ), സുനില്‍ തത്ക്കറെ (റായ്ഗഡ്) തുടങ്ങിയവരാണ് പട്ടികയിലെ മറ്റു പ്രമുഖര്‍. പാര്‍ട്ടിയുടെ ശക്തികേന്ദ്രമായ മവാലിലെ സ്ഥാനാര്‍ഥിയുടെ പേര് പട്ടികയില്‍ ഇടംപിടിച്ചില്ല. എന്‍.സി.പിയുമായി സഖ്യം ചേര്‍ന്നു മത്സരിക്കുന്ന കോണ്‍ഗ്രസ് ഇവിടെ അഞ്ചുസീറ്റുകളിലെ സ്ഥാനാര്‍ഥികളെ കഴിഞ്ഞദിവസം പ്രഖ്യാപിച്ചിരുന്നു.
മുന്‍ കേന്ദ്രമന്ത്രിയും ലോക്‌സഭാ സ്പീക്കറുമായിരുന്ന പി.എം സഈദിന്റെ മകന്‍ ഹംദുല്ലാ സഈദിനെ പരാജയപ്പെടുത്തിയാണ് ഫൈസല്‍ കഴിഞ്ഞതവണ ആദ്യമായി ലോക്‌സഭയിലേക്കു തെരഞ്ഞെടുക്കപ്പെട്ടത്.
ഫൈസലിന് 21,665 വോട്ടുകള്‍ ലഭിച്ചപ്പോള്‍ ഹംദുല്ലക്ക് 20,130 വോട്ടുകളും ലഭിച്ചു. കഴിഞ്ഞതവണത്തേതു പോലെ ദ്വീപില്‍ കോണ്‍ഗ്രസും എന്‍.സി.പിയും തമ്മില്‍ തന്നെയാണ് ഇത്തവണയും പ്രധാന മല്‍സരം.