തിരുവനന്തപുരം: കരമനയില്‍ കൊഞ്ചിറവിള സ്വദേശി അനന്തു(21 )വിനെ തട്ടിക്കൊണ്ടുപോയി ക്രൂരമായി കൊലപ്പെടുത്തിയകേസില്‍ ഒരുപ്രതിയൊഴികെ എല്ലാവരെയും പൊലിസ് പിടികൂടി.മൂന്ന് സഹോദരന്‍മാരുള്‍പ്പെടെ ഏഴുപേരാണ് ഇന്നലെ അറസ്റ്റിലായത്. ഇതോടെ കേസില്‍ പിടിയിലായ പ്രതികളുടെ എണ്ണം പന്ത്രണ്ടായി. ഒളിവില്‍ പോയ സുമേഷിനായി കേരളത്തിന് പുറത്തേക്ക് അന്വേഷണം വ്യാപിപ്പിച്ചു. കഴിഞ്ഞദിവസം അറസ്റ്റിലായ കേസിലെ മറ്റ് പ്രതികളായ കിരണ്‍ കൃഷ്ണന്‍, മുഹമ്മദ് റോഷന്‍, അഭിലാഷ്, അരുണ്‍ബാബു, റാംകാര്‍ത്തിക് എന്നിവരെ റിമാന്‍ഡ് ചെയ്തു.
കൊലപാതകത്തിന്റെ മുഖ്യ സൂത്രധാരനായ വിഷ്ണുരാജ്, സഹോദരന്‍മാരായ വിനീഷ് രാജ്, കുഞ്ഞുവാവയെന്ന വിജയരാജ്, സംഘത്തിലെ മറ്റംഗങ്ങളായ ഹരിലാലെന്ന നന്ദു, കുടപ്പനെന്ന അനീഷ്, അപ്പുവെന്ന അഖില്‍, ശരത് എന്നിവരാണ് പിടിയിലായത്. കൊലപാതകത്തില്‍ നേരിട്ട് പങ്കെടുത്ത ശരത് ഒഴികെയുള്ളവരെ പിടികൂടിയത് പൂവാറിലെ ഒളിസങ്കേതത്തില്‍നിന്നാണ്. ശരത്തിനെ ചെന്നൈയിലെ ഒളിസങ്കേതത്തില്‍ നിന്നും പിടികൂടി. ഇതോടെ കേസിലെ 13 പ്രതികളില്‍ 12പേരും പിടിയിലായി.
സിറ്റി പൊലിസ് കമ്മിഷണര്‍ സഞ്ജയ് കുമാര്‍ ഗുരുദിന്റെ നേതൃത്വത്തില്‍ ഡെപ്യൂട്ടി കമ്മിഷണര്‍ ആദിത്യ, അസി. കമ്മിഷണര്‍മാരായ പ്രതാപന്‍ നായര്‍, ശിവസുതന്‍ പിള്ള , ഷാഡോ പൊലിസ് എസ്.ഐ സുനിലാല്‍, കരമന എസ്.ഐ ദീപു എന്നിവരുള്‍പ്പെട്ട സംഘമാണ് പ്രതികളെ പിടികൂടിയത്. കൂടുതല്‍ അന്വേഷണത്തിനായി ഇവരെ വരുംദിവസങ്ങളില്‍ കസ്റ്റഡിയില്‍ വാങ്ങുമെന്ന് പൊലിസ് പറഞ്ഞു.