അന്തിക്കാട്: ക്ഷേത്ര വാദ്യകലാരംഗത്ത് നിറസാന്നിധ്യമായി മാറിയ അന്തിക്കാട് വടക്കേക്കര ക്ഷേത്ര വാദ്യകലാ സമിതിയുടെ ഇരുപതാം വാര്‍ഷിക ആഘോഷത്തിന്റെ ഭാഗമായി പുറത്തിറക്കുന്ന വിവരണ പത്രികയുടെ പ്രകാശന കര്‍മ്മം സി.എന്‍ ജയദേവന്‍ എം.പി നിര്‍വഹിച്ചു.
എം.പി.യുടെ മണലൂരിലെ വസതിയില്‍ വെച്ച് വിവര പത്രിക സമിതി രക്ഷാധികാരി കൂടിയായ പത്മശ്രീ പെരുവനം കുട്ടന്‍ മാരാര്‍ ഏറ്റുവാങ്ങി.
ചടങ്ങില്‍ ഇ.രമേശന്‍ അധ്യക്ഷനായി. സമിതി പ്രസിഡന്റ് അന്തിക്കാട് പത്മനാഭന്‍, സെക്രട്ടറി എ.വി രാമചന്ദ്രന്‍, ട്രഷറര്‍ കെ.ഷാജി തുടങ്ങി വാദ്യകലാസമിതിയിലെ മുഴുവന്‍ അംഗങ്ങളും പ്രകാശന ചടങ്ങില്‍ പങ്കെടുത്തു.
അന്തിക്കാട് ഹൈസ്‌കൂളില്‍ വെച്ച് ആഗസ്റ്റ് പതിനാലിന് നടക്കുന്ന വാര്‍ഷികാഘോഷ ചടങ്ങില്‍ വാദ്യകലാ സമിതി ഗുരുനാഥന്‍ കൂടിയായ പഴുവില്‍ രഘു മാരാര്‍ക്ക് വീരശൃംഖല സമര്‍പ്പിക്കും.
ഒരു ദിനം നീണ്ട് നില്‍ക്കുന്ന ആഘോഷ ചടങ്ങുകള്‍ കൃഷിമന്ത്രി അഡ്വ.വി.എസ് സുനില്‍കുമാര്‍ ഉദ്ഘാടനം ചെയ്യും. ബ്രഹ്മശ്രീ ചേന്നാസ് ദിനേശന്‍ നമ്പൂതിരിപ്പാട് പഴുവില്‍ രഘു മാരാര്‍ക്ക് വീരശൃംഖല സമര്‍പ്പിക്കും. ചടങ്ങില്‍ സാമൂഹിക രാഷ്ട്രീയ കലാരംഗത്തെ പ്രമുഖര്‍ പങ്കെടുക്കും.