കല്‍പ്പറ്റ: ലക്കിടിയിലെ റിസോര്‍ട്ടില്‍ മാവോയിസ്റ്റ് നേതാവ് സി.പി ജലീല്‍ വെടിയേറ്റ് മരിച്ച സംഭവത്തില്‍ നടക്കുന്ന ക്രൈംബ്രാഞ്ച് അന്വേഷണം പ്രഹസനമെന്ന് മനുഷ്യാവകാശ പ്രവര്‍ത്തകര്‍.
ജലീലിന്റെ മരണത്തിന് ഉത്തരവാദികളായ പൊലിസുകാര്‍ക്കെതിരേ ക്രിമിനല്‍ കേസെടുക്കണമെന്നും റിസോര്‍ട്ടില്‍ വസ്തുതാന്വേഷണം നടത്താനെത്തിയ സംഘം വാര്‍ത്താസമ്മേളനത്തില്‍ പറഞ്ഞു. കൊല്ലപ്പെട്ട ജലീല്‍ ഉള്‍പ്പെടെയുള്ള മാവോയിസ്റ്റുകള്‍ക്കെതിരേ മാത്രമാണ് കേസെടുത്തിരിക്കുന്നത്. ഏറ്റുമുട്ടല്‍ കൊലകള്‍ സംബന്ധിച്ച സുപ്രിംകോടതി മാര്‍ഗനിര്‍ദേശങ്ങള്‍ ഇവിടെ ലംഘിക്കപ്പെട്ടിരിക്കുകയാണ്. സംഭവത്തില്‍ ഉള്‍പ്പെട്ട പൊലിസുകാര്‍ക്കെതിരേ ഇതുവരെ കേസെടുക്കാന്‍ തയാറായിട്ടില്ല. വസ്തുതകള്‍ അന്വേഷിക്കാനെത്തിയ മനുഷ്യാവകാശ പ്രവര്‍ത്തകരെ സംഭവം നടന്ന റിസോര്‍ട്ടിലേക്ക് കയറ്റിവിടാത്തത് ദുരൂഹത വര്‍ധിപ്പിക്കുന്നതാണ്. മാധ്യമപ്രവര്‍ത്തകരെപ്പോലും കയറ്റിവിടാത്തതിനുപിന്നില്‍ പൊലിസിനെ സംരക്ഷിക്കാനുള്ള നീക്കമാണ്.
തെളിവുകള്‍ നശിപ്പിക്കപ്പെടാനുള്ള സാധ്യത കൂടുതലാണ്. റിസോര്‍ട്ടിലെ ജീവനക്കാരെ കാണാനോ തെളിവെടുപ്പ് നടത്താനോ പൊലിസ് അനുവദിച്ചില്ല. സുപ്രിംകോടതി നിര്‍ദേശപ്രകാരമെന്ന് പറഞ്ഞ് നടത്തുന്ന മജിസ്‌ട്രേറ്റ്തല അന്വേഷണം സര്‍ക്കാരിനെയും പൊലിസിനെയും വെള്ളപൂശാനുള്ള നീക്കം മാത്രമാണെന്നും അവര്‍ പറഞ്ഞു.
വാര്‍ത്താസമ്മേളനത്തില്‍ ഗ്രോ വാസു, അഭിഭാഷകരായ പി.എ പൗരന്‍, തുഷാര്‍ നിര്‍മല്‍ സാരഥി, അലാവുദ്ദീന്‍, രാജു, സുജ ഭാരതി തുടങ്ങിയവര്‍ പങ്കെടുത്തു.