ന്യൂഡല്‍ഹി: കേരളത്തിലെ ബി.ജെ.പി സ്ഥാനാര്‍ഥിപ്പട്ടികയുമായി ബന്ധപ്പെട്ട ചര്‍ച്ചകള്‍ക്ക് സംസ്ഥാന പ്രസിഡന്റ് പി.എസ് ശ്രീധരന്‍ പിള്ളയും കുമ്മനം രാജശേഖരനും ഡല്‍ഹിയിലെത്തി. സ്ഥാനാര്‍ഥിപ്പട്ടികയുമായി ബന്ധപ്പെട്ട് സംസ്ഥാനത്ത് ഉടലെടുത്ത തര്‍ക്കം പരിഹരിക്കാന്‍ ബി.ജെ.പി ദേശീയ നേതൃത്വം വിളിച്ചതനുസരിച്ചാണ് ഇരുവരും ഡല്‍ഹിയിലെത്തിയത്. ബി.ജെ.പിക്കു സാധ്യത കല്‍പ്പിക്കപ്പെടുന്ന മണ്ഡലങ്ങളിലെ സ്ഥാനാര്‍ഥിത്വത്തിനായി നേതാക്കള്‍ തമ്മിലുള്ള പിടിവലിയാണ് നേതൃത്വത്തെ കുഴക്കുന്നത്.
തൃശൂര്‍ സീറ്റ് ബി.ഡി.ജെ.എസുമായുള്ള ധാരണ പ്രകാരം തുഷാര്‍ വെള്ളാപ്പള്ളിക്കു നല്‍കിയാല്‍ പത്തനംതിട്ട സീറ്റ് വേണമെന്നാണ് സംസ്ഥാന ജനറല്‍ സെക്രട്ടറി കെ. സുരേന്ദ്രന്റെ ആവശ്യം.
തിരുവനന്തപുരത്ത് കുമ്മനം രാജശേഖരന്‍ മത്സരിക്കുമെന്ന് ഉറപ്പായതോടെ പത്തനംതിട്ടയാണ് ശ്രീധരന്‍ പിള്ളയുടെ ലക്ഷ്യം. വിജയ സാധ്യതയുള്ള സീറ്റല്ല നല്‍കുന്നതെങ്കില്‍ മത്സരിക്കാനില്ലെന്ന നിലപാടിലാണ് മറ്റൊരു ജനറല്‍ സെക്രട്ടറി എം.ടി രമേശ്. ഇതിനിടെ ദേശീയ നേതൃത്വം ഇടപെട്ട് കോണ്‍ഗ്രസില്‍നിന്ന് ബി.ജെ.പിയിലേക്ക് കൊണ്ടുവന്ന ടോം വടക്കനും സീറ്റ് കണ്ടെത്തേണ്ടതുണ്ട്. തൃശൂര്‍ തന്നെ ലഷ്യംവയ്ക്കുന്ന വടക്കന് ചാലക്കുടിയെങ്കിലും നല്‍കേണ്ടിവരും.