തിരൂരങ്ങാടി: ദാറുല്‍ഹുദാ ഇസ്‌ലാമിക് യൂനിവേഴ്‌സിറ്റിയുടെ മുഴുവന്‍ യു.ജി കോളജുകളിലെയും സെക്കന്‍ഡറിയിലേക്ക് നടന്ന ഏകീകൃത പ്രവേശന പരീക്ഷാ ഫലം പ്രസിദ്ധീകരിച്ചു. ഫലം വാഴ്‌സിറ്റിയുടെ ഔദ്യോഗിക വെബ്‌സൈറ്റില്‍.

വാഴ്‌സിറ്റിക്കു കീഴിലുള്ള ഫാത്തിമ സഹ്‌റാ വനിതാകോളജ്, മമ്പുറം ഹിഫ്‌ളുല്‍ ഖുര്‍ആന്‍ കോളജ് എന്നീ സ്ഥാപനങ്ങളിലേക്കു നടന്ന പ്രവേശന പരീക്ഷയുടെ ഫലവും പ്രസിദ്ധീകരിച്ചിട്ടുണ്ട്. കേരളത്തിലെ 24 സ്ഥാപനങ്ങളിലായി 888 സീറ്റുകളിലേക്കാണ് ഒന്നാം അലോട്ട്‌മെന്റിന്‍ പ്രവേശനം.
അലോട്ട്‌മെന്റ് ലഭിച്ച വിദ്യാര്‍ഥികള്‍ അഡ്മിറ്റ് കാര്‍ഡ് ഡൗണ്‍ലോഡ് ചെയ്ത് ഈ മാസം 30 നകം നിശ്ചിത സ്ഥാപനങ്ങളില്‍ പ്രവേശനം ഉറപ്പുവരുത്തേണ്ടതുമാണ്.
പുതുതായി പ്രവേശനം ലഭിച്ച വിദ്യാര്‍ഥികള്‍ക്ക് ജൂലൈ 4 ന് ക്ലാസുകള്‍ ആരംഭിക്കും. മമ്പുറം ഹിഫ്‌ളുല്‍ ഖുര്‍ആന്‍ കോളജിലേക്ക് പ്രവേശനം ലഭിച്ച വിദ്യാര്‍ഥികള്‍ക്കും 4 ന് ക്ലാസുകള്‍ ആരംഭിക്കും.
വാഴ്‌സിറ്റിയുടെ ഹിഫ്‌ളുല്‍ ഖുര്‍ആന്‍ കോളജിലെ 17 സീറ്റുകളിലേക്ക് 378 വിദ്യാര്‍ഥികളും വനിതാ കോളജ് സെക്കന്‍ഡറി വിഭാഗത്തിലെ 35 സീറ്റുകളിലേക്ക് 559 വിദ്യാര്‍ഥികളുമാണ് ഇത്തവണ പ്രവേശന പരീക്ഷ എഴുതിയത്.
വനിതാകോളജിലേക്ക് പ്രവേശനം ലഭിച്ച വിദ്യാര്‍ഥികള്‍ക്ക് ജൂലൈ 7 ന് ശനിയാഴ്ച ക്ലാസുകള്‍ ആരംഭിക്കും.