വൈത്തിരി: വെടിയുണ്ടകളും കാട്ടിറച്ചിയുമായി രണ്ടു പേരെ വൈത്തിരി പൊലിസ് പിടികൂടി. ഈങ്ങാപ്പുഴ താന്നിക്കാട്ടുകുഴിയില്‍ ബിജു (51), പുതുപ്പാടി കാക്കമട്ട വീട്ടില്‍ സജി പൗലോസ് (44) എന്നിവരാണ് പിടിയിലായത്. ഇവര്‍ സഞ്ചരിച്ച കാറില്‍ നിന്നും മൂന്ന് കിലോയോളം ഇറച്ചിയും 12 നാടന്‍ തോക്കിന്‍ തിരകളും പൊലിസ് കണ്ടെടുത്തു.
മദ്യപിച്ച് വാഹനം ഓടിച്ചതിനാണ് ഇവരെ ആദ്യം പൊലിസ് പിടികൂടിയത്. തുടര്‍ന്ന് ഇവര്‍ക്ക് ജാമ്യം അനുവദിക്കുകയും ചെയ്തിരുന്നു. പൊലിസിന് ലഭിച്ച രഹസ്യ വിവരത്തിന്റെ അടിസ്ഥാനത്തില്‍ വീണ്ടും ഇവരെ പിടികൂടി പരിശോധന നടത്തിയപ്പോഴാണ് ഇവര്‍ സഞ്ചരിച്ച കാറില്‍ നിന്ന് മൂന്ന് കിലോയോളം കാട്ടിറച്ചിയും വെടിയുണ്ടകളും കണ്ടെടുത്തത്. മൂന്ന് പൊട്ടിച്ച തിരകളും ഒന്‍പത് പൊട്ടിക്കാത്ത തിരകളുമാണ് പരിശോധനയില്‍ ലഭിച്ചത്. മാംസം കാട്ടുപന്നിയുടെതാണെന്നാണ് പ്രാഥമിക നിഗമനം. തുടര്‍ന്ന് പ്രതികളെ വനപാലകര്‍ക്ക് കൈമാറി. അറസ്റ്റിലായ ബിജു കോഴിക്കോട് പുതുപ്പാടി പഞ്ചായത്ത് മുന്‍ സ്റ്റാന്‍ഡിങ് കമ്മിറ്റി ചെയര്‍മാനാണ്. നിലവില്‍ പുതുപ്പാടി മണ്ഡലം കോണ്‍ഗ്രസ് പ്രസിഡന്റും,പഞ്ചായത്ത് യു.ഡിഎഫ് കണ്‍വീനറുമാണ്.