തൃക്കരിപ്പൂര്‍: ചെമ്മീന്‍ കൂട്ടത്തെ അകത്താക്കാനെത്തിയ ഭീമന്‍ തിരണ്ടിയെ മത്സ്യത്തൊഴിലാളികള്‍ പിടികൂടി തൃക്കരിപ്പൂരിലെ മത്സ്യ മാര്‍ക്കറ്റിലെത്തിച്ചു. ഇന്നലെ രാവിലെ മടക്കര തുറമുഖത്ത് നിന്ന് ചെറുവള്ളത്തില്‍ മത്സ്യം പിടിക്കാന്‍ പോയ മത്സ്യത്തൊഴിലാളികള്‍ക്കാണ് മൂന്നൂറ് കിലോ തൂക്കമുള്ള തിരണ്ടിയെ കിട്ടിയത്.
ചെമ്മീന്‍ കൂട്ടങ്ങളിലേക്ക് എത്തിയ തിരണ്ടിയെ മത്സ്യത്തൊഴിലാളികള്‍ വള്ളത്തില്‍ ഘടിപ്പിച്ച മോട്ടോര്‍ ഉപയോഗിച്ച് ചെമ്മീന്‍ കൂട്ടത്തെ വഴിമാറ്റിയാണ് ഭീമനെ അകത്താക്കിയത്. തൃക്കരിപ്പൂര്‍ മത്സ്യ മാര്‍ക്കറ്റിലെത്തിയ ഭീമനെ 18,000 രൂപയ്ക്കാണ് മത്സ്യത്തൊഴിലാളികള്‍ ലേലത്തിനെടുത്തത്. മൂന്നു മണിക്കൂറോളം എടുത്താണ് തിരണ്ടിയെ ചെറിയ തുണ്ടുകളാക്കി മാറ്റിയത്. കിലോയ്ക്ക് 150 മുതല്‍ 200 രൂപാ നിരക്കിലാണ് ചില്ലറ വില്‍പന നടത്തിയത്.