ചെന്നൈ: പൂച്ചയെ കൊന്ന്  ജഡം പ്രദര്‍ശിപ്പിച്ച് ടിക്ക്‌ടോക്കില്‍ വിഡിയോ പങ്കുവച്ച 18കാരന്‍ അറസ്റ്റില്‍. ബുധനാഴ്ചയാണ് തിരുനെല്‍വേലി പൊലിസ് ഇയാളെ അറസ്റ്റ് ചെയ്തത്. മെയ് 16നാണ് ഇയാള്‍ വിഡിയോ അപ്‌ലോഡ് ചെയ്തത്. 

വീടിന്റെ മേല്‍ക്കൂരയില്‍ കെട്ടിയ കയറില്‍ ഒരു പൂച്ചയുടെ മൃതദേഹം തൂങ്ങിക്കിടക്കുന്നതായിരുന്നു വിഡിയോ. ഈ മൃതദേഹത്തില്‍ പിടിച്ച് അത് ആട്ടിവിടുന്ന ഒരാളെയും വിഡിയോയില്‍ കാണാമായിരുന്നു. ഫ്രണ്ട്‌സ് എന്ന തമിഴ് സിനിമയിലെ ഒരു കോമഡി രംഗമായിരുന്നു വിഡിയോയുടെ പശ്ചാത്തലത്തില്‍ ഉണ്ടായിരുന്നത്.

വിഡിയോക്കെതിരേ സമൂഹമാധ്യമങ്ങളില്‍ കടുത്ത വിമര്‍ശനങ്ങള്‍ ഉയര്‍ന്നു. ഇയാളെ അറസ്റ്റ് ചെയ്യണമെന്ന് ആളുകള്‍ ആവശ്യപ്പെട്ടു. അറസ്റ്റ് ആവശ്യപ്പെട്ട് ഒരു ആക്ടിവിസ്റ്റ് പൊലിസില്‍ പരാതി നല്‍കിയതിനെ തുടര്‍ന്നായിരുന്നു അറസ്റ്റ്.

തിരുനെല്‍വേലി ടൗണില്‍ നിന്ന് 25 കിലോമീറ്റര്‍ മാറി സത്യപുരം എന്ന സ്ഥലത്ത് താമസിക്കുന്നയാളാണ് പ്രതിയെന്ന് പൊലിസ് പറയുന്നു. ഇന്ത്യന്‍ ശിക്ഷാ നിയമം 429 അനുസരിച്ചാണ് ഇയാളെ അറസ്റ്റ് ചെയ്തത്. തുടര്‍ന്ന് ജാമ്യത്തില്‍ വിട്ടയച്ചു.ഇത്തരത്തില്‍, മൃഗങ്ങള്‍ക്കെതിരേ അതിക്രമം നടത്തി വിഡിയോ ടിക്ക്‌ടോക്കില്‍ അപ്‌ലോഡ് ചെയ്ത കുറ്റത്തിന് നേരത്തെ ട്രിച്ചി പൊലിസ് ആറു പേരെ അറസ്റ്റ് ചെയ്തിരുന്നു.