ചേളാരി: സമസ്ത കേരള ജംഇയ്യത്തുല്‍ ഉലമയുടെ 'ദഅ്‌വത്തിനൊരു കൈത്താങ്ങ് ' പദ്ധതിയുടെ ഭാഗമായുള്ള ഭവന സന്ദര്‍ശനം ഇന്ന് സംസ്ഥാനത്തിനകത്തും പുറത്തുമായി നടക്കും.
സമസ്ത കേരള ഇസ്‌ലാം മത വിദ്യാഭ്യാസ ബോര്‍ഡിന്റെ പതിനായിരത്തോളം വരുന്ന മദ്‌റസകളുടെയും ഒന്‍പതിനായിരത്തില്‍പരം വരുന്ന മഹല്ലു കമ്മിറ്റികളുടെയും സംയുക്ത ആഭിമുഖ്യത്തില്‍ മാര്‍ച്ച് 22ന് വെള്ളിയാഴ്ച നടക്കുന്ന ഫണ്ട് സമാഹരണത്തിന്റെ മുന്നോടിയാണ് ഭവന സന്ദര്‍ശനം.
പത്തുലക്ഷം വീടുകളില്‍ സമസ്തയുടെ ഫണ്ട് സമാഹരണ സന്ദേശവുമായി മദ്‌റസാ മുഅല്ലിംകളും മാനേജിങ് കമ്മിറ്റി അംഗങ്ങളും സംഘടനാ പ്രവര്‍ത്തകരും കയറി സമസ്ത നേതാക്കളുടെ സന്ദേശം കൈമാറും. 22ന് പള്ളികളില്‍വച്ച് നേരത്തെ വീടുകളിലെത്തിച്ച കവറുകളിലെ സംഭാവനകള്‍ ശേഖരിക്കും. തുടര്‍ന്ന് പള്ളികളില്‍ വച്ച് പ്രത്യേക പ്രാര്‍ഥന നടക്കും. വെള്ളിയാഴ്ച പള്ളികളില്‍വച്ച് സൗകര്യപ്പെടാത്തിടങ്ങളില്‍ 24ന് ഞായറാഴ്ച മദ്‌റസകളില്‍വച്ച് ഫണ്ട് ശേഖരണം നടത്തും.
ഇതു സംബന്ധമായ സന്ദേശവും കവറും ഓരോ വീട്ടിലുമെത്തിക്കുന്നതിനുവേണ്ടി റെയ്ഞ്ച് ജംഇയ്യത്തുല്‍ മുഅല്ലിമീന്‍ കമ്മിറ്റി മുഖേന എല്ലാ മദ്‌റസകളിലേക്കും ഫണ്ട് സമാഹരണ കിറ്റ് വിതരണം ചെയ്തിട്ടുണ്ട്. ഏതെങ്കിലും മദ്‌റസകളില്‍ ലഭിക്കാത്തതുണ്ടെങ്കില്‍ വിവരം ഓഫിസില്‍ അറിയിക്കണമെന്നും സമസ്ത ഓഫിസില്‍ നിന്ന് അറിയിപ്പുണ്ട്.