കോഴിക്കോട്: നഗരത്തിലേക്കുള്ള വഴി കാണിച്ചുതരാമെന്ന് പറഞ്ഞ് കണ്ടെയ്‌നര്‍ ലോറിയില്‍ കയറിയ യുവാവ് ലോറിയെ പാലത്തിനടിയില്‍ കുടുക്കി. ഇതേ തുടര്‍ന്ന് നഗരത്തില്‍ അഞ്ചു മണിക്കൂറോളം ഗതാഗതം തടസപ്പെട്ടു. ഇന്നലെ രാവിലെ ഫ്രാന്‍സിസ് റോഡ് മേല്‍പ്പാലത്തിന് താഴെയാണ് സംഭവം. ഇതുകാരണം കല്ലായ് ഭാഗത്തുനിന്ന് നഗരത്തിലേക്കുള്ള ഗതാഗതം അഞ്ചു മണിക്കൂറോളം തടസപ്പെട്ടു. തുടര്‍ന്ന് ട്രാഫിക് പൊലിസും നാട്ടുകാരും പോര്‍ട്ടര്‍മാരും ചേര്‍ന്നാണ് ഗതാഗതം നിയന്ത്രിച്ചത്. ആനിഹാള്‍ റോഡിലേക്ക് വന്ന കണ്ടെയ്‌നര്‍ ലോറിയാണ് കുരുക്കില്‍പ്പെട്ടത്. സാധാരണ രാത്രികാലങ്ങളിലാണ് ലോറി നഗരത്തില്‍ വരാറുള്ളത്.
എന്നാല്‍ ഇന്നലെ പുതിയ ഡ്രൈവറായിരുന്നു ലോറിയിലുണ്ടായിരുന്നത്. വഴി കാണിക്കാനായി ഒരു യുവാവും ലോറിയില്‍ കയറി. 500 രൂപ വാങ്ങിയാണത്രെ ഇയാള്‍ ലോറിക്ക് വഴികാട്ടിയായത്. പുഷ്പ ജങ്ഷനില്‍ നിന്ന് പാലത്തിന് അടിയിലൂടെ റെയില്‍വേ സ്റ്റേഷന്‍ റോഡിലേക്ക് തിരിയുമ്പോഴാണ് പാലത്തിന്റെ സ്പാനിന് കണ്ടെയ്‌നര്‍ തട്ടിയത്. ലോറി പിന്നോട്ടെടുത്ത് കുരുക്കഴിക്കാന്‍ നോക്കിയപ്പോള്‍ കൂടുതല്‍ കുരുങ്ങി. ലോറി ഊരാക്കുടുക്കിലകപ്പെട്ടുവെന്ന് ബോധ്യപ്പെട്ടതോടെ യുവാവ് മുങ്ങി. പിന്നീട് വലിയ ക്രെയിന്‍ കൊണ്ടുവന്നാണ് ലോറിയെ കുരുക്കില്‍ നിന്ന് നീക്കിയത്. ഈസമയമത്രയും വെള്ളം പോലും കുടിക്കാനാകാതെ ലോറിയില്‍ കുടുങ്ങിയ ഡ്രൈവര്‍ എല്ലാവര്‍ക്കും നന്ദി പറഞ്ഞാണ് യാത്ര തുടര്‍ന്നത്.