ഗൂഡല്ലൂര്‍: കാടിറങ്ങിയ വമ്പ് വീടുകളുടെ അടുക്കളയിലുമെത്തി. കഴിഞ്ഞ ദിവസം രാത്രിയില്‍ ഓവാലി സീഫോര്‍ത്ത് നാലാം നമ്പറിലാണ് ഒരേസമയം ആശ്ചര്യവും ഭീതിയും ഉളവാക്കുന്ന സംഭവമുണ്ടായത്.
 നാല് ആനകളും കുട്ടികളുമടങ്ങിയ സംഘമാണ് പ്രദേശത്തെ വീടുകളിലേക്ക് ക്ഷണിക്കാത്ത അതിഥികളായെത്തിയത്. അര്‍ധരാത്രിയില്‍ വീടിന്റെ പിന്‍ഭാഗം തകരുന്ന ശബ്ദംകേട്ടാണ് പ്രദേശത്തുകാരനായ അന്‍വര്‍ ഉറക്കമുണര്‍ന്നത്.
ശബ്ദംകേട്ടിടത്തേക്ക് നോക്കിയപ്പോള്‍ പിന്‍ഭാഗം തകര്‍ത്ത് ആനക്കുട്ടി അടുക്കളയിലേക്ക് കയറുന്നതാണ് അന്‍വര്‍ കണ്ടത്. ഉടന്‍തന്നെ കുടുംബാംഗങ്ങളെയും കൂട്ടി അന്‍വര്‍ ജീവനും കൊണ്ട് സമീപത്തെ വീട്ടില്‍ അഭയം പ്രാപിക്കുകയായിരുന്നു. അടുക്കളയില്‍ കയറിയ ആനക്കുട്ടി സകല സാധനങ്ങളും തകര്‍ത്ത് തരിപ്പണമാക്കിയതിന് ശേഷമാണ് പുറത്ത് കടന്നത്. വീട്ടുപകരണങ്ങള്‍ നഷ്ടപ്പെട്ടെങ്കിലും ജീവന്‍ തിരിച്ചുകിട്ടിയതിന്റെ ആശ്വാസത്തിലാണ് അന്‍വറും കുടുംബവും. അന്‍വറിന്റെ വീട്ടിലെ പരാക്രമങ്ങള്‍ക്ക് ശേഷം ആനക്കൂട്ടം തൊട്ടടുത്ത താമസക്കാരായ സഫിയയുടെയും ഫാത്തിമയുടെയും വീടുകളിലുമെത്തി.
 ഇവിടെയും വീടിന്റെ പിന്‍ഭാഗം ആനക്കൂട്ടം തകര്‍ത്തിട്ടുണ്ട്. ഇതുമായി ബന്ധപ്പെട്ട് മൂന്ന് കുടുംബങ്ങളും വനംവകുപ്പില്‍ പരാതി നല്‍കിയിട്ടുണ്ട്. പ്രദേശത്തെ വന്യമൃഗ ശല്ല്യത്തിന് ശാശ്വത പരിഹാരം കാണാന്‍ അധികൃതരുടെ ഭാഗത്തുനിന്നും നടപടി ഉണ്ടാവണമെന്നാണ് നാട്ടുകാരുടെ ആവശ്യം.