കരുനാഗപ്പള്ളി: എഫ്.സി.ഐയില്‍ നിന്നും വെയര്‍ഹൗസിങ് ഗോഡൗണിലേക്ക് സ്റ്റോക്ക് ചെയ്യാനായി കയറ്റി അയക്കുന്ന ലോഡുകളില്‍ ടണ്‍ കണക്കിന് റേഷന്‍ ഭക്ഷ്യസാധനങ്ങള്‍ വെയര്‍ ഹൗസിംഗ് ഗോഡൗണിലെത്താതെ ലോഡുകള്‍ കരിഞ്ചന്തയിലേക്ക് കടത്തുന്നതായി ആക്ഷേപമുയരുന്നു. വാതില്‍പ്പടി സംവിധാനത്തിലൂടെ വിതരണം ചെയ്യാനുള്ള റേഷന്‍ ഭക്ഷ്യസാധനങ്ങള്‍ കരുനാഗപ്പള്ളി മാളിയേക്കല്‍ ജങ്ഷനിലുള്ള വെയര്‍ഹൗസിന്റെ ഗോഡൗണില്‍ സ്റ്റോക്ക് ചെയ്ത ശേഷം അവിടെ നിന്നും നേരിട്ട് റേഷന്‍ ഡിപ്പോയ്ക്ക് വിതരണം ചെയ്യുകയാണ് രീതി. ഇതിനായി കരുനാഗപ്പള്ളി എഫ്.സി.ഐയില്‍ ഗുഡ്‌സ് ട്രെയിന്‍ വാഗന്‍ വഴി എത്തിയ ഭക്ഷ്യധാന്യങ്ങള്‍ ലോറികളില്‍ കയറ്റി വെയര്‍ഹൗസിന്റെ ഗോഡൗണില്‍ എത്തിച്ചു. അവിടെ നിന്നായിരുന്നു വിതരണം. എന്നാല്‍ എഫ്.സി.ഐയില്‍ നിന്നും ലോറിയില്‍ കയറ്റി വിടുന്ന ലോഡുകളില്‍ ചിലത് നേരെ കരിഞ്ചന്തയിലേക്ക് പോകുകയാണെന്നാണ് ആക്ഷേപം. കഴിഞ്ഞ ദിവസം കരുനാഗപ്പള്ളി എഫ്.സി.ഐയില്‍ നിന്നും കയറ്റിവിട്ട ടണ്‍ കണക്കിന് റേഷന്‍ ഭക്ഷ്യസാധനങ്ങളില്‍ എതാണ്ട് മുക്കാല്‍ ശതമാനം മാത്രമാണത്രെ വെയര്‍ ഹൗസിന്റെ ഗോഡൗണില്‍ എത്തിയതെന്നാണ് വിവരം.