മനാമ: കെ.എം.സി.സി ബഹ്‌റൈന്‍ ചെറിയ പെരുന്നാളോഘാഷം സംഘടിപ്പിച്ചതു നിര്‍മാണ കമ്പനിയിലെ ലേബര്‍ ക്യാംപില്‍ തൊഴിലാളികള്‍ക്കൊപ്പം. മുന്നോറോളം വരുന്ന തൊഴിലാളികള്‍ക്ക് സ്‌നേഹത്തിന്റെ വിരുന്നൊരുക്കി നല്‍കി ഈദാഘോഷം നടത്തിയത് വേറിട്ടതായി.

ടൂബ്ലി ബൊക്കാവ നിര്‍മാണ കമ്പനി ലേബര്‍ ക്യാംപില്‍ സംഘടിപ്പിച്ച ആഘോഷത്തിന് കെ.എം.സി.സി പ്രവര്‍ത്തകരെ കൂടാതെ കമ്പനി മാനേജുമെന്റ് പ്രതിനിധികളും ടൂബ്ലി കാനൂ മസ്ജിദ് ഇമാമും എത്തിയിരുന്നു. തൊഴിലാളികള്‍ക്കായി നടത്തിയ ഈദാഘോഷം ഏറ്റവും പുണ്യകരമായ സേവനമാണെന്നു ടൂബ്ലി കാനൂ മസ്ജിദ് ഇമാം ഹബീബ് നംലൈതി പറഞ്ഞു. റമദാന്‍ മാസത്തില്‍ നടത്തിയ പ്രാര്‍ഥനകളും സേവനങ്ങളും തുടര്‍ ജീവിതത്തിലും നിലനിര്‍ത്തണമെന്ന് അദ്ദേഹം ഓര്‍മിപ്പിച്ചു. ഈദാഘോഷം സംഘടിപ്പിച്ച ബഹ്‌റൈന്‍ കെ.എം.സി.സിയെ അദ്ദേഹം അഭിനന്ദിക്കുകയും പിന്തുണ അറിയിക്കുകയും ചെയ്തു.

തങ്ങളുടെ പ്രവാസ ജീവിതത്തില്‍ ആദ്യമായാണ് ഈദാഘോഷത്തില്‍ തങ്ങളോടൊപ്പം ചേരാന്‍ ഒരു പ്രവാസി സംഘടന എത്തുന്നതെന്ന് തൊഴിലാളികള്‍ പറഞ്ഞു. ഇതിനു മുന്‍കൈയെടുത്ത ബഹ്‌റൈന്‍ കെ.എം.സി.സിയെ കമ്പനി എച്ച്.ആര്‍ മാനേജര്‍ മുഹമ്മദ് റൈസ് പ്രശംസിക്കുകയും തൊഴിലാളികള്‍ പ്രത്യേകം നന്ദിയറിയിക്കുകയും ചെയ്തു. ഹാഷിം റഹ്മാന്‍, ഖാലിദ് കുനിയാലില്‍, റിയാസ് എന്നിവര്‍ ഗാനങ്ങള്‍ ആലപിച്ചു. തൊഴിലാളികള്‍ നടത്തിയ പ്രത്യേക കലാപരിപാടികള്‍ ആഘോഷത്തിന് മികവേകി.

കെ.എം.സി.സി സംസ്ഥാന പ്രസിഡന്റ് എസ്.വി ജലീല്‍, ജനറല്‍ സെക്രട്ടറി അസൈനാര്‍ കളത്തിങ്ങല്‍, സെക്രട്ടറി പി.വി സിദ്ധിക്ക്, മുന്‍ പ്രസിഡന്റ് സി.കെ അബ്ദുല്‍ റഹ്മാന്‍, ടി.പി മുഹമ്മദലി, ഫൈസല്‍ കോട്ടപ്പള്ളി, സലാം മമ്പാട്ടുമൂല, ഷാഫി പാറക്കട്ട, ഒ.കെ കാസ്സിം, മുസ്തഫ , നൗഫല്‍, അഹമ്മദ് കണ്ണൂര്‍, യസീദ് മലയമ്മ, ശിഹാബ് നിലമ്പൂര്‍, ഹുസൈന്‍, ശരീഫ്, മൊയ്ദീന്‍ പേരാമ്പ്ര, കാസ്സിം നൊച്ചാട്, നുമാന്‍, നൂറുദീന്‍ മാട്ടൂല്‍, മൗസില്‍ മൂപ്പന്‍, റഷീദ് നൊച്ചാട്, തേവലക്കര ബാദുഷ തുടങ്ങി വിവിധ കെ.എം.സി.സി നേതാക്കളും, കമ്പനി സൂപ്പര്‍വൈസര്‍ മുഹമ്മദ് താരിഖ് തുടങ്ങി മാനേജ്‌മെന്റ് പ്രതിനിധികളും ആഘോഷ പരിപാടികള്‍ക്ക് നേതൃത്വം നല്‍കി.