മട്ടാഞ്ചേരി:ഫോര്‍ട്ട്‌കൊച്ചിയിലെ കോളനികളില്‍ യുവാക്കള്‍ക്ക് വില്‍പ്പന നടത്തുന്നതിനായി കൊണ്ട് വന്ന മുക്കാല്‍ കിലോ കഞ്ചാവുമായി യുവാവിനെ ഫോര്‍ട്ട്‌കൊച്ചി പൊലീസ് അറസ്റ്റ് ചെയ്തു.കണ്ണമാലി സ്വദേശി ബിജു സേവ്യര്‍(43)നെയാണ് ഫോര്‍ട്ട്‌കൊച്ചി സുരേഷ് കുമാറിന്റെ നേതൃത്വത്തില്‍ അറസ്റ്റ് ചെയ്തത്.മട്ടാഞ്ചേരി അസി.കമ്മീഷ്ണര്‍ എസ്.വിജയന് ലഭിച്ച രഹസ്യ വിവരത്തെ തുടര്‍ന്ന് ബുധനാഴ്ച വൈകിട്ട് ഫോര്‍ട്ട്‌കൊച്ചി പരേഡ് മൈതാനത്തിന് സമീപത്തെ വാട്ടര്‍ ടാങ്കിന് സമീപം കഞ്ചാവ് വില്‍പ്പന നടത്തുന്നതിനിടെയിലാണ് ഇയാള്‍ പിടിയിലാകുന്നത്.പശ്ചിമകൊച്ചിയില്‍ കഞ്ചാവ് വില്‍പ്പന നടത്തുന്ന സംഘത്തിലെ പ്രധാനിയായ ഇയാളില്‍ നിന്ന് പൊലീസിന് കൂടുതല്‍ വിവരങ്ങള്‍ ലഭിച്ചിട്ടുണ്ട്.ചെറിയ പൊതികളിലാക്കിയാണ് ഇയാള്‍ കഞ്ചാവ് വില്‍പ്പന നടത്തുന്നത്.എ.എസ്.ഐ.രഘുനന്ദന്‍,സീനിയര്‍ സിവില്‍ പൊലീസ് ഓഫീസര്‍ മനാഫ്,സിവില്‍ പൊലീസ് ഓഫീസര്‍മാരായ ജോണ്‍,സതീശന്‍,സുജിത്ത് എന്നിവരും പ്രതിയെ പിടികൂടിയ സംഘത്തിലുണ്ടായിരുന്നു.പ്രതിയെ കോടതിയില്‍ ഹാജരാക്കി.
കൊച്ചി:എറണാകുളം കെ.എസ്.ആര്‍.ടി.സി ബസ് സ്റ്റാന്‍ഡിനു സമീപത്തുനിന്നും കഞ്ചാവുമായി യുവാവിനെ ഷാഡോ പൊലിസ് പിടികൂടി.ആമ്പല്ലൂര്‍ ചെത്തിക്കോട് യദുകൃഷ്ണനാണ് (24) പിടിയിലായത്.വിദ്യാര്‍ഥികള്‍ക്ക് കഞ്ചാവ് എത്തിച്ചുകൊടുക്കുന്ന ഇയാള്‍ ഷാഡോ സബ് ഇന്‍സ്‌പെക്ടര്‍ ഹണി.കെ.ദാസിന്റെ നേതൃത്വത്തിലുള്ള സംഘത്തിന്റെ നിരീക്ഷണത്തിലായിരുന്നു.
എറണാകുളം സെന്‍ട്രല്‍ സബ് ഇന്‍സ്‌പെക്ടര്‍ ജോസഫ് സാജന്റെ നേതൃത്വത്തില്‍ അഡീഷനല്‍ എസ്.ഐ നിത്യാനന്ദ പൈ, സിവില്‍ പൊലിസ് ഓഫിസര്‍മാരായ സാനു,സാനു മോന്‍, വിശാല്‍, ഷൈമോന്‍ എന്നിവരടങ്ങുന്ന സംഘമാണ് പ്രതിയെ പിടികൂടിയത്.