ചെമ്മട്ടംവയല്‍: ജില്ലാ ആശുപത്രി വളപ്പില്‍ സൂക്ഷിച്ച സര്‍ക്കാര്‍ വാഹനങ്ങള്‍ കൊതുകു വളര്‍ത്തു കേന്ദ്രമായി മാറി. ആംബുലന്‍സ് ഉള്‍പ്പെടെ കാലാവധി കഴിഞ്ഞതും അല്ലാത്തതുമായ വാഹനങ്ങളാണ് കടുത്ത ആരോഗ്യ പ്രശ്‌നങ്ങളുണ്ടാക്കുന്നത്.
രണ്ട് വാഹനങ്ങള്‍ കാലാവധി കഴിഞ്ഞതും മറ്റൊന്ന് പെട്രോള്‍ വാഹനമായതിനാല്‍ ഉപയോഗിക്കാതെ തള്ളി വെച്ചതുമാണ്. മഴ തുടങ്ങിയതോടെ വാഹനങ്ങളില്‍ വെള്ളം കെട്ടിക്കിടക്കുവാന്‍ തുടങ്ങി. ഇത് കൊതുകകള്‍ക്ക് വളരാനുള്ള കേന്ദ്രമായി മാറിയതോടെ നിര്‍ത്തിയിട്ട വാഹനങ്ങള്‍ ആരോഗ്യത്തിനും ഭീഷണിയായി മാറിയിരിക്കുകയാണ്.
സാധാരണയായി ഇത്തരം കാലാവധി കഴിഞ്ഞതും തകരാറായതുമായ വാഹനങ്ങള്‍ അംഗീകൃത വര്‍ക്ക് ഷോപ്പുകളിലേക്ക് മാറ്റുകയാണ് പതിവ്. ഇത്തരത്തില്‍ അംഗീകൃത വര്‍ക്ക് ഷോപ്പ് നീലേശ്വരത്തുണ്ട്. അവിടേക്ക് മാറ്റാമെന്നിരിക്കെ അധികൃതര്‍ ഇതിന് തയാറായിട്ടില്ല. കാലാവധി കഴിഞ്ഞെങ്കിലും ലക്ഷങ്ങളുടെ മുതലാണ് നശിക്കുന്നത്. ഇതില്‍ കാലാവധി കഴിയാത്ത വാഹനവും സര്‍ക്കാറിന് നഷ്ടം വരുത്തുകയാണ്.