തൊടുപുഴ:  പെമ്പിളൈ ഒരുമൈയയുടെ തോട്ടം തൊഴിലാളിസമരത്തിലൂടെ ശ്രദ്ധനേടിയ ശേഷം സംഘടനയെ തള്ളിപ്പറഞ്ഞ് പുറത്തുവന്ന ഗോമതി വീണ്ടും സംഘടനയിലേയ്ക്ക് തിരിച്ചു പോകാനുള്ള ഒരുക്കത്തില്‍. നിലവില്‍ പ്രവര്‍ത്തിക്കുന്ന സി.ഐ.ടി.യു തൊഴിലാളിയൂനിയനില്‍ നിന്നും രാജിവെച്ചതായി പ്രഖ്യാപിച്ച ഗോമതി സി.പി.എം, സി.പി.ഐ, കോണ്‍ഗ്രസ് അടക്കമുള്ള പ്രസ്ഥാനങ്ങള്‍ക്കെതിരെ നിലകൊള്ളുമെന്നും തൊടുപുഴയില്‍ നടത്തിയ വാര്‍ത്താസമ്മേളനത്തില്‍ പറഞ്ഞു.
 സി.പി.എമ്മിന്റെ  തൊഴിലാളി വിരുദ്ധ നിലപാടും കയേറ്റക്കാരെയും ഭൂമാഫിയായേയും സംരക്ഷിക്കുന്ന അവരുടെ ഇരട്ടത്താപ്പ് നയത്തില്‍  മനംനൊന്താണ് താന്‍ ഈ തീരുമാനത്തിലെത്താന്‍ കാരണമെന്ന് ഗോമതി പറഞ്ഞു. ഇല്ലാത്ത ഭൂമിക്ക് സീറോ ലാന്‍ഡ് പദ്ധതി പ്രകാരം പാവങ്ങള്‍ക്ക് പട്ടയം നല്‍കി. പെന്‍ഷന്‍ പറ്റിയതോടെ കമ്പനി വസതിയില്‍ നിന്ന് പുറത്താക്കപ്പെട്ട തൊഴിലാളികളെ സംരക്ഷിക്കുന്നതിനായി അവര്‍ക്ക് വീടും സ്ഥലവും നല്‍കാമെന്ന് തനിക്ക് ഉറപ്പ് നല്‍കി തന്നെ സി.പി.എമ്മിലേക്ക് ക്ഷണിച്ചു വരുത്തി തന്നെ വഞ്ചിക്കുകയായിരുന്നു. മൂന്നാര്‍ കയ്യേറ്റത്തില്‍ എല്ലാ രാഷ്ട്രീയ പാര്‍ട്ടികള്‍ക്കും പങ്കുണ്ട്. എല്ലാം താന്‍ പെമ്പിളൈ ഒരുമൈ സംഘത്തില്‍ എത്തിയശേഷം വിശദമാക്കും. വരും കാലങ്ങളില്‍ പെമ്പിളൈ ഒരുമൈക്ക് ഒപ്പം നിന്ന് തൊഴിലാളികള്‍ക്കുവേണ്ടി പ്രവര്‍ത്തിക്കുമെന്ന് ഗോമതി വ്യക്തമാക്കി. പൊമ്പിളൈ ഒരുമൈ വൈസ് പ്രസിഡന്റ് കൗസല്യയും ഗോമതിക്കൊപ്പം എത്തിയിരുന്നു.