റോസ്‌റ്റോവ് അരീന: കന്നി ലോകകപ്പിനെത്തിയ ഐസ്‌ലന്റ് ക്രൊയേഷ്യന്‍ ചൂടില്‍ അലിഞ്ഞുതീര്‍ന്നു. ഗ്രൂപ്പ് ഡിയിലെ അവസാന മത്സരത്തില്‍ ക്രൊയേഷ്യ 2-1 ന് ഐസ്‌ലന്റിനെ പരാജയപ്പെടുത്തി. തോല്‍വിയോടെ പ്രീക്വാര്‍ട്ടര്‍ കാണാതെ ഐസ്‌ലന്റ് പുറത്തായി. നിര്‍ണായക മത്സരത്തില്‍ ക്രൊയേഷ്യയെ വിറപ്പിച്ചാണ് ഐസ്‌ലന്റ് കീഴടങ്ങിയത്. ജയത്തോടെ പ്രീ ക്വാര്‍ട്ടര്‍ സാധ്യതയുണ്ടായിരുന്നതിനാല്‍ മികച്ച മത്സരമാണ് ഐസ്‌ലന്റ് കാഴ്ചവച്ചത്.
ക്രൊയേഷ്യക്ക് വേണ്ടി മിലാന്‍ ബാദെല്‍ജും ഇവാന്‍ പെരിസിച്ചും വല ചലിപ്പിച്ചപ്പോള്‍ ഐസ്‌ലന്റ് ഗില്‍ഫി സിഗുര്‍ഡ്‌സണിലൂടെ ഒരു ഗോള്‍ മടക്കി. ഗ്രൂപ്പ് ഡി ജേതാക്കളായി മുന്നേറിയ ക്രൊയേഷ്യക്ക് പ്രീക്വാര്‍ട്ടറില്‍ ഗ്രൂപ്പ് സിയിലെ രണ്ടാം സ്ഥാനക്കാരായ ഡെന്‍മാര്‍ക്കാണ് എതിരാളികള്‍. 53ാം മിനുട്ടിലാണ് മത്സരത്തിലെ ആദ്യ ഗോള്‍ പിറന്നത്. ഇടത് വിങ്ങില്‍ നിന്ന് പെരിസിച്ച് നല്‍കിയ പന്ത് ഐസ്‌ലന്റ് ഡിഫന്‍ഡര്‍മാരുടെ കാലില്‍ തട്ടി ബോക്‌സിലേക്ക്. ഒരു മികച്ച ഹാഫ് വോളിയിലൂടെ മിലാന്‍ ബാദെല്‍ജ് വലയിലാക്കി. 76ാം മിനുട്ടില്‍ ഐസ്‌ലന്റ് ഗില്‍ഫി സിഗുര്‍ഡ്‌സണിലൂടെ സമനില പിടിച്ചു. ബോക്‌സില്‍ വച്ച് ക്രൊയേഷ്യന്‍ പ്രതിരോധ താരം ലോവ്‌റന്റെ കൈയില്‍ പന്ത് തട്ടിയതിന് ലഭിച്ച പെനാല്‍റ്റി സിഗുര്‍ഡസണ്‍ വലയിലാക്കി. മത്സരത്തിന്റെ 90ാം മിനുട്ടില്‍ ഇവാന്‍ പെരിസിച്ചാണ് ഐസ്‌ലന്റിന്റെ നെഞ്ചില്‍ രണ്ടാം വെടി പൊട്ടിച്ചത്. ബാദെല്‍ജ് നീട്ടി നല്‍കിയ പന്തുമായി കുതിച്ച പെരിസിച്ച് ഒരു മികച്ച ഷോട്ടിലൂടെ ഗോള്‍ നേടി.
കഴിഞ്ഞ മത്സരങ്ങളില്‍ നൈജീരിയയെയും അര്‍ജന്റീനയെയും പരാജയപ്പെടുത്തിയ ക്രൊയേഷ്യ ചരിത്രത്തില്‍ ആദ്യമായി ഗ്രൂപ്പ് ഘട്ടത്തിലെ എല്ലാ മത്സരങ്ങളും വിജയിച്ച് റെക്കോര്‍ഡിട്ടു. 1998ല്‍ സെമിഫൈനലില്‍ എത്തിയ ക്രൊയേഷ്യന്‍ ടീമിന് പോലും നേടാനാവാത്ത നേട്ടമാണ് ലൂക്കാ മോഡ്രിച്ചിന്റെ നായകമികവില്‍ കൈവരിച്ചത്.
1998 ല്‍ ഗ്രൂപ്പ് എച്ചില്‍ നിന്ന് അര്‍ജന്റീനക്ക് പിറകില്‍ രണ്ടാം സ്ഥാനക്കാരായാണ് ക്രൊയേഷ്യ പ്രീ ക്വാര്‍ട്ടറില്‍ കടന്നത്. 1998ല്‍ ഗ്രൂപ്പ് മത്സരങ്ങളില്‍ ജമൈക്കയെ 3-1 നും ജപ്പാനെ 1-0ത്തിനും പരാജയപ്പെടുത്തിയ ക്രൊയേഷ്യ അര്‍ജന്റീനയോടായിരുന്നു 1-0 ത്തിന് തോല്‍വിയറിഞ്ഞത്. അന്ന് സെമിഫൈനലില്‍ പ്രീക്വാര്‍ട്ടറില്‍ റൊമേനിയയെയും (1-0) ക്വാര്‍ട്ടറില്‍ ജര്‍മനിയെയും (3-0) അട്ടിമറിച്ച് മുന്നേറിയ ക്രൊയേഷ്യന്‍ പട സെമിഫൈനലില്‍ ഫ്രാന്‍സിന് മുന്‍പില്‍ 2-1 ന് പരാജയപ്പെട്ടു.