റിയാദ്: കഴിഞ്ഞ വര്‍ഷം റെക്കോര്‍ഡ് യാത്രികരാണ് സഊദി വിമാനത്താവളങ്ങള്‍വഴി കടന്നു പോയതെന്ന് ജനറല്‍ അതോരിറ്റി ഫോര്‍ സിവില്‍ ഏവിയേഷന്‍ (സാഗിയ) അറിയിച്ചു.
2017നേക്കാള്‍ 23 മില്ല്യണിലധികം യാത്രക്കാരാണ് കഴിഞ്ഞ വര്‍ഷം സഊദിയുടെ വിവിധ വിമാനത്താവളങ്ങള്‍വഴി കടന്നുപോയത്. 7,71,828 സര്‍വിസുകള്‍വഴി 99.86 മില്യണ്‍ യാത്രികരാണ് 2018ല്‍ യാത്ര ചെയ്തത്. 2017നേക്കാള്‍ യാത്രികരില്‍ എട്ടു ശതമാനവും വിമാനങ്ങളില്‍ 4.1 ശതമാനവും വര്‍ധനവാണ് രേഖപ്പെടുത്തിയത്. 2018ല്‍ 29,935 വിമാനങ്ങളിലായി 2.6 മില്യണ്‍ യാത്രികര്‍ ആഭ്യന്തര യാത്രികരും ഉള്‍പ്പെടും.

ജിദ്ദ കിംഗ് അബ്ദുല്‍ അസീസ് വിമാനത്താവളം വഴിയാണ് രാജ്യത്തെ ഏറ്റവും കൂടുതല്‍ വിമാനയാത്രികര്‍ കടന്നുപോയത്. 35.8 മില്യണ്‍ യാത്രികരാണ് ഇതുവഴി കടന്നുപോയത്.

തലസ്ഥാന നഗരിയായ റിയാദിലെ കിംഗ് ഖാലിദ് അന്താരാഷ്ട്ര വിമാനത്താവളംവഴി 27.9 മില്യണ്‍ യാത്രികരും യാത്രചെയ്തു. അന്താരാഷ്ട്ര സെക്ടറില്‍ യു.എ.ഇയിലേക്കാണ് ഏറ്റവും യാത്രികര്‍ പറന്നത്. വിവിധ രാജ്യങ്ങളിലേക്ക് യു.എ.ഇയിലെ വിവിധ വിമാനങ്ങള്‍വഴി കണക്ഷന്‍ വിമാനങ്ങള്‍ ഉള്ളതിനാലാണ് യു.എ.ഇ ഈ ഗണത്തില്‍ ഉള്‍പ്പെടാന്‍ കാരണം.